വ്യാജ വെബ്‌സൈറ്റില്‍ വഞ്ചിതരാകരുത്; മുന്നറിയിപ്പുമായി സുപ്രീംകോടതി

ന്യൂദല്‍ഹി: സുപ്രീംകോടതിയുടെ പേരില്‍ വ്യാജ വെബ്‌സൈറ്റ് എന്ന് പരാതി. ഔദ്യോഗിക വെബ്‌സൈറ്റ് എന്ന നിലയില്‍ പ്രവര്‍ത്തിക്കുന്ന വ്യാജ വെബ്‌സൈറ്റില്‍ ക്ലിക്ക് ചെയ്ത് വഞ്ചിതരാകരുതെന്ന് മുന്നറിയിപ്പ് നല്കി സുപ്രീംകോടതി രജിസ്ട്രി പൊതുനോട്ടീസും പുറത്തിറക്കി.
വ്യാജ വെബ്‌സൈറ്റിന് പിന്നിലുള്ളവരെ കണ്ടെത്തി നിയമത്തിന് മുന്നില്‍ കൊണ്ടുവരണമെന്ന് ആവശ്യപ്പെട്ട് സുപ്രീംകോടതി രജിസ്ട്രാര്‍ (ടെക്‌നോളജി) ഹര്‍ഗുര്‍വരിന്ദ് സിങ് ജഗ്ഗി പോലീസില്‍ പരാതിയും നല്കി.http://cbins/scigv.com, tthps://cbins.scigv.com/offence എന്നിവയാണ് വ്യാജ വെബ്‌സൈറ്റുകള്‍.
ഈ വ്യാജ വെബ്‌സൈറ്റ് ജനങ്ങളില്‍ നിന്ന് സ്വകാര്യ, രഹസ്യ വിവരങ്ങള്‍ ആരായുകയാണെന്ന് സുപ്രീം കോടതി രജിസ്ട്രി വ്യക്തമാക്കി. ആരും സ്വകാര്യ, രഹസ്യ വിവരങ്ങള്‍ കൈമാറരുത്. നല്കുന്ന വിവരങ്ങള്‍ ചോര്‍ത്താന്‍ ഉപയോഗിച്ചേക്കാമെന്നും രജിസ്ട്രി മുന്നറിയിപ്പ് നല്കി.
www.sci.gov.in ആണ് സുപ്രീംകോടതിയുടെ ഔദ്യോഗിക വെബ്‌സൈറ്റ്. ആധികാരികത ഉറപ്പ് വരുത്താതെ ലിങ്കുകളില്‍ ക്ലിക്ക് ചെയ്യരുതെന്നും ആരുടെയും വ്യക്തിഗത വിവരങ്ങളോ സ്വകാര്യ വിവരങ്ങളോ സാമ്പത്തിക വിവരങ്ങളോ സുപ്രീംകോടതി രജിസ്ട്രി ചോദിക്കാറില്ലെന്നും രജിസ്ട്രി വ്യക്തമാക്കി.
വ്യാജവെബ്‌സൈറ്റുമൂലം ആരെങ്കിലും വഞ്ചനയ്‌ക്ക് ഇരയായിട്ടുണ്ടെങ്കില്‍ ഉടന്‍ തന്നെ എല്ലാ ഓണ്‍ലൈന്‍ അക്കൗണ്ടുകളുടേയും പാസ്വേര്‍ഡുകള്‍ മാറ്റാന്‍ രജിസ്ട്രി നിര്‍ദേശിച്ചു. ഇതിനുപുറമെ ബാങ്ക്, ക്രെഡിറ്റ് കാര്‍ഡ് അധികൃതരെ ഇക്കാര്യം അറിയിക്കണമെന്നും നോട്ടീസിലുണ്ട്.