ബെംഗളൂരു: ഒപ്പം താമസിക്കുന്ന കാമുകിയെ പ്രഷര്‍ കുക്കര്‍ കൊണ്ട് തലയ്‌ക്കടിച്ച്കൊലപ്പെടുത്തിയ മലയാളിയായ 29 കാരനെ ബെംഗളൂരു പൊലീസ് പിടികൂടി. ഇക്കഴിഞ്ഞ ശനിയാഴ്ചയാണ് വാക്കേറ്റത്തെ തുടര്‍ന്ന് യുവാവ് ഒപ്പം താമസിക്കുന്ന കാമുകിയെ പ്രഷര്‍ കുക്കര്‍ കൊണ്ട് തലയ്ക്കടിച്ച് കൊലപ്പെടുത്തിയത്. ഇരുവരും മലയാളികളാണ്. കോളെജില്‍ പഠിയ്‌ക്കുമ്പോള്‍ ഇരുവരും കൂട്ടുകാരായിരുന്നു. പിന്നീടാണ് ബെംഗളൂരുവില്‍ ഒന്നിച്ച് താമസിച്ച് ജോലി ചെയ്തു തുടങ്ങിയത്. ബെംഗളൂരുവില്‍ രണ്ടുവര്‍ഷമായി വിവാഹിതരാവാതെ ഒന്നിച്ച് താമസിക്കുകയായിരുന്നു വൈഷ്ണവും ദേവയും.
സംശയരോഗമാണ് കാരണമെന്ന് പറയുന്നു. സെയില്‍സ്, മാര്‍ക്കറ്റിംഗ് ജോലി ചെയ്യുന്ന ഇരുവരും ബെംഗളൂരുവില്‍ കോരമംഗലയില്‍ ഒന്നിച്ചു താമസിച്ച് വരികയായിരുന്നു. ഇരു കൂട്ടരുടെയും വീട്ടുകാര്‍ക്ക് ഇക്കാര്യം അറിയാം. വൈഷ്ണവിന്റെ സംശയ രോഗം കാരണം ഇരുവരും തമ്മില്‍ കൂടെക്കൂടെ വഴക്കിടാറുണ്ടെന്നും വീട്ടുകാര്‍ക്കറിയാമായിരുന്നു. ദേവയുടെ സഹോദരി ഫോണില്‍ വിളിച്ച് കിട്ടാതായപ്പോള്‍ അയല്‍ക്കാരെ വിളിച്ചപ്പോഴാണ് അവര്‍ പൊലീസില്‍ പരാതി നല്‍കിയത്. പിന്നീട് പൊലീസ് പരിശോധിച്ചപ്പോള്‍ മരിച്ചുകിടക്കുന്ന ദേവയെ കണ്ടെത്തിയത്. വൈഷ്ണവ് ഒളിവിലായിരുന്നു.
കഴിഞ്ഞ ദിവസം പൊലീസ് നാടകീയമായി വൈഷ്ണവിനെ അറസ്റ്റ് ചെയ്തു. വൈഷ്ണവിനെതിരെ കൊലക്കുറ്റത്തിന് കേസെടുത്തതായി ബെംഗളൂരു സൗത്ത് ഈസ്റ്റ് ഡിവിഷന്‍ ഡപ്യൂട്ടി പൊലീസ് കമ്മീഷണര്‍ സി.കെ. ബാബ പറഞ്ഞു.
