ന്യൂദല്ഹി: ഇസ്ലാമിക മതമൗലികവാദികളുടെ അക്രമണത്തെ തുടര്ന്ന് മുടങ്ങി യ ശ്രാവണപൂജായാത്രയ്ക്ക് നൂഹ് വീണ്ടും തയാറെടുക്കുന്നു. മേവാത്തിലെ സര്വ ഹിന്ദു സമാജിന്റെ നേതൃത്വത്തില് ബ്രജ്മണ്ഡല ജലാഭിഷേകയാത്ര നാളെ നടക്കും. സന്ത് സമിതി ചെയര്മാന് സ്വാമി ജിതേന്ദ്രാനന്ദ്, സ്വാമി ധര്മ്മദേവ്, സ്വാമി നവല് കിഷോര് ദാസ്, സ്വാമി ആദിത്യനാഥ് തുടങ്ങിയ ആചാര്യന്മാര് യാത്രയ്ക്ക് നേതൃത്വം നല്കും. വിഎച്ച്പി വര്ക്കിങ് പ്രസിഡന്റ് അഡ്വ. അലോക് കുമാര് പങ്കെടുക്കും. മഹാപഞ്ചായത്ത് സമിതി ചെയര്മാന് അരുണ് സെയില്ദാര് ആണ് യാത്രസംബന്ധിച്ച വിവരങ്ങള് മാധ്യമപ്രവര്ത്തകരെ ധരിപ്പിച്ചത്.
ജൂലൈ 31നാണ് നൂഹിലെ മഹാദേവക്ഷേത്രത്തിലേക്കുള്ള ഘോഷയാത്രയ്ക്ക് നേരെ ആസൂത്രിതമായ അക്രമണം നടന്നത്. രണ്ട് ഹോംഗാര്ഡുമാരടക്കം ആറ് പേരാണ് നൂഹിലും ഗുരുഗ്രാമിലും നടന്ന അക്രമങ്ങളില് മരിച്ചത്. സമാധാനപരവും ഭക്തിപൂര്ണവുമാകും യാത്ര.
രാജ്യം ജി 20 ഉച്ചകോടിക്ക് ആതിഥ്യം വഹിക്കാന് ഒരുങ്ങുന്നതിനിടയില് കല്ലേറും അക്രമവും കൊണ്ട് സമൂഹത്തില് വര്ഗീയകലാപം സൃഷ്ടിക്കാന് ചിലര് ആസൂത്രിമായ നീക്കം നടത്തുന്നുവെന്നത് സര്വ ഹിന്ദു സമാജ് ഗൗരവത്തിലെടുത്തിട്ടുണ്ട്. എന്നാല് കല്ലേറില് ആചാരങ്ങള് മുടങ്ങുന്ന സാഹചര്യം നാളെ ജീവിക്കാനുള്ള സ്വാതന്ത്ര്യത്തെപോലും ബാധിക്കുമെന്നതിനാലാണ് അന്ന് മുടങ്ങിയ യാത്ര പൂര്ത്തീകരിക്കാന് തീരുമാനിച്ചതെന്ന് അരുണ്സെയില്ദാര് പറഞ്ഞു. മേവാത്തിലെ അക്രമികള്ക്കെതിരെ പോലീസ് സ്വീകരിച്ച സമഗ്രനടപടികള് കണക്കിലെടുത്ത്, ഭരണകൂടവുമായി ചര്ച്ച ചെയ്താവും ജലാഭിഷേകയാത്രയുടെ സ്വഭാവം തീരുമാനിക്കുക.
യാത്രയ്ക്ക് സമ്പൂര്ണപിന്തുണയുമായി വിശ്വഹിന്ദുപരിഷത്ത് ഒപ്പമുണ്ടെന്നത് നൂഹിലെ ഹിന്ദുസമാജത്തിന് വലിയ ആത്മവിശ്വാസമാണ് പകരുന്നതെന്ന് സെയില്ദാര് ചൂണ്ടിക്കാട്ടി.
അതേസമയം മേവാത്തിലെ ജലാഭിഷേക യാത്രയ്ക്ക് പിന്തുണ പ്രഖ്യാപിച്ച് ഹരിയാനയിലെ എല്ലാ ബ്ലോക്കുകളിലും ശിവക്ഷേത്രങ്ങളില് നാളെ രാവിലെ 11ന് ബഹുജന ജലാഭിഷേകം സംഘടിപ്പിക്കുമെന്ന് വിശ്വഹിന്ദുപരിഷത്ത് ജോയിന്റ് ജനറല് സെക്രട്ടറി ഡോ. സുരേന്ദ്ര ജെയിന് പറഞ്ഞു. ഭാവിയില് ഹിന്ദുസമാജത്തിന്റെ ആചാരപരമായ ചടങ്ങുകള് തടസ്സപ്പെടാതിരിക്കാനുള്ള മുന്കരുതലാണിത്.
സമാധാനപരമായ സഹവര്ത്തിത്വത്തിന്റെ തത്വങ്ങള്ക്കനുസൃതമായി പെരുമാറാന് അക്രമികള്ക്ക് നല്ല ബുദ്ധി ഉണ്ടാകാന് ഭഗവാന് ശിവനോട് പ്രാര്ത്ഥിക്കും, സുരേന്ദ്ര ജയിന് പറഞ്ഞു.
അനുമതി നിഷേധിച്ചു, വന് സുരക്ഷ
നൂഹില് വിശ്വഹിന്ദു പരിഷത്തിന്റെ ബ്രിജ് മണ്ഡല് ജലാഭിഷേക യാത്ര നാളെ നടത്താനിരിക്കെ സംസ്ഥാനത്ത് വന് സുരക്ഷാ ക്രമീകരണങ്ങള്.
ശോഭായാത്രാ ആഹ്വാനത്തെ തുടര്ന്ന് നൂഹിലും മറ്റ് പ്രദേശങ്ങളിലും സുരക്ഷ ശക്തമാക്കി. അതേസമയം, ശോഭായാത്രയ്ക്ക് ജില്ലാ ഭരണകൂടം അനുമതി നിഷേധിച്ചു.
സപ്തംബര് മൂന്ന് മുതല് ഏഴ് വരെ നൂഹില് നടക്കാനിരിക്കുന്ന ജി20 ഷെര്പ്പ ഗ്രൂപ്പിന്റെ യോഗത്തെ തുടര്ന്നാണ് യാത്രയ്ക്ക് ഭരണകൂടം അനുമതി നിഷേധിച്ചതെന്ന് ഡിജിപി ശത്രുജീത് കപൂര് പറഞ്ഞു.
സംസ്ഥാന, ജില്ല അതിര്ത്തികളിലും സുരക്ഷ ശക്തമാക്കിയിട്ടുണ്ട്. 24 കമ്പനി അര്ദ്ധസൈനിക വിഭാഗത്തിന് പുറമെ 1,900 പോലീസിനെയും നിരീക്ഷണത്തിനായി വിന്യസിച്ചിട്ടുണ്ടെന്ന് അധികൃതര് അറിയിച്ചു.
26 മുതല് 28 വരെ മൊബൈല് ഇന്റര്നെറ്റ് താത്കാലികമായി നിര്ത്തിവച്ചു. പുറത്തുനിന്നുള്ള ആരെയും നൂഹില് പ്രവേശിക്കാന് അനുവദിക്കില്ല. ജില്ലാ ആതിര്ത്തിയും മല്ഹാര് ക്ഷേത്രത്തിലേക്കുള്ള വഴികളും അടച്ചു.
അതിര്ത്തി സംസ്ഥാനങ്ങളായ പഞ്ചാബ്, ദല്ഹി, ഉത്തര്പ്രദേശ്, രാജസ്ഥാന്, ചണ്ഡീഗഢ് എന്നിവിടങ്ങളിലും ജാഗ്രതാ നിര്ദേശമുണ്ട്.
