നെയ്യാറ്റിൻകര: ഓണവിപണി ലക്ഷ്യംവച്ച് തയ്യാറാക്കിയ 504 ലിറ്റർ വ്യാജമദ്യം പിടികൂടി. ബാലരാമപുരം ഉച്ചക്കടയിൽ അനധികൃതമായി വ്യാജ മദ്യം വിൽപ്പന നടത്തുന്നതെന്ന് കിട്ടിയ രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് മലയിൻകീഴ് സ്വദേശികളായ മൂന്നുപേർ അറസ്റ്റിലായത് .മലയിൻകീഴ് സ്വദേശിയായ സന്തോഷ് കുമാർ, വിളവൂർക്കൽ സ്വദേശി പ്രകാശ്, വെള്ളയാണി ഊക്കോട് സ്വദേശി സതീഷ് കുമാർ എന്നിവരെയാണ് അറസ്റ്റ് ചെയ്തത്. മുൻ എക്സൈസ് കമ്മിഷ്ണറുടെ വ്യാജ ഒപ്പ് പതിപ്പിച്ച ഹോളോഗ്രാം സ്റ്റിക്കർ ഉൾപ്പെടെ പിടികൂടി.
സന്തോഷ്കുമാറിന്റെ വീട്ടിൽ സൂക്ഷിച്ചിരുന്ന 504 ലിറ്റർ വ്യാജ മദ്യമാണ് പിടികൂടിയത്. മലയിൻകീഴ് വിളവൂർക്കൽ സ്വദേശിയായ പ്രകാശിന്റെ ഉടമസ്ഥയിൽ ഉള്ളതാണ് വ്യാജ മദ്യം.
മൂന്നു പ്രതികളും ചേർന്ന് ഓണത്തിന് വില്പന നടത്തുന്നതിന് വേണ്ടി സൂക്ഷിച്ചിരുന്നതാണ്. നെയ്യാറ്റിൻകര എക്സൈസ് സർക്കിൾ ഓഫീസിലെ പ്രിവന്റിവ് ഓഫീസർ ഷാജി കുമാറിന്റെ നേതൃത്വത്തിലാണ് വ്യാജമദ്യം പിടികൂടിയത്. അഞ്ചു ലക്ഷത്തിലധികം വില വരുന്ന വ്യജമദ്യമാണ് പിടികൂടിയത്.
