ഷാരൂഖ് ഖാന്റെ റിലീസ് ചെയ്യാനിരിക്കുന്ന ജവാന് എന്ന ചിത്രത്തിന്റെ മുന്‍കൂര്‍ ബുക്കിംഗ് യുഎസ് ഉള്‍പ്പെടെയുള്ള ചില വിദേശ രാജ്യങ്ങളില്‍ ആരംഭിച്ചു കഴിഞ്ഞു. ഷാരൂഖിന്റെ സമീപകാല ബ്ലോക്ക്ബസ്റ്റര്‍ ചിത്രം പത്താനെക്കാള്‍ മികച്ച പ്രതികരണമാണ് ലഭിക്കുന്നത്. സെപ്തംബര്‍ 7നാണ് ലോകമെമ്പാടുമുള്ള റിലീസ്. ഹിന്ദി, തമിഴ്, തെലുങ്ക് ഭാഷകളില്‍ 2ഡിയിലും ഐമാക്സിലും റിലീസ് ചെയ്യും.
യു എസില്‍ 289 ഇടങ്ങളില്‍ 74200 ഡോളറിന്റെ ഏകദേശം 4800 ടിക്കറ്റുകള്‍ ഇതിനകം വിറ്റുകഴിഞ്ഞു.യുഎസില്‍ പത്താനെക്കാള്‍ വലിയ വിജയം പ്രതീക്ഷിക്കുന്നതിനാല്‍ വരും ദിവസങ്ങളില്‍ ജവാന്റെ ലൊക്കേഷനുകളും ഷോകളും വര്‍ധിപ്പിക്കുമെന്നാണ് റിപ്പോര്‍ട്ട്.
നോര്‍ത്ത് അമേരിക്കയില്‍ ആദ്യ ദിനത്തില്‍ പത്താന്‍ 1.85 ദശലക്ഷം ഡോളര്‍ നേടി. ജവാന് ഈ തുക മറികടക്കുമെന്നാണ് കരുതുന്നത്.യുഎഇയിലും ജവാന് മുന്‍കൂര്‍ ബുക്കിംഗ് ആരംഭിച്ചു. ജര്‍മ്മനി, ഓസ്ട്രേലിയ എന്നിവിടങ്ങളിലും മുന്‍കൂര്‍ ബുക്കിംഗ് തുടങ്ങിയിട്ടുണ്ട്.
ജവാനില്‍ ഷാരൂഖിനൊപ്പം വിജയ് സേതുപതി, നയന്‍താര, സന്യ മല്‍ഹോത്ര, പ്രിയാമണി എന്നിവരും അഭിനയിക്കുന്നു. പത്താനില്‍ നായികയായിരുന്ന ദീപിക പദുക്കോണ്‍ ജവാനില്‍ അതിഥി വേഷത്തില്‍ എത്തുന്നു.
റെഡ് ചില്ലീസ് എന്റര്‍ടെയ്ന്‍മെന്റ് നിര്‍മ്മിച്ചിരിക്കുന്ന ചിത്രത്തിന്റെ സംഗീതം അനിരുദ്ധ് രവിചന്ദര്‍ ആണ്. ചിത്രത്തിലെ രണ്ടാമത്തെ ഗാനമായ ചലേയ അടുത്തിടെ പുറത്തിറങ്ങിയിരുന്നു.
ജവാന് ശേഷം, രാജ്കുമാര്‍ ഹിരാനിയുടെ ഡങ്കിയിലും ഷാരൂഖ് അഭിനയിക്കും.ചിത്രം ഡിസംബറില്‍ തിയറ്ററുകളില്‍ എത്തും. തപ്സി പന്നുവാണ് നായിക.
