കിളിമാനൂര്‍ : ബന്ധു വീട്ടില്‍ വിരുന്നിനെത്തിയ നവദമ്പതികളടക്കം മൂന്നുപേരെ പുഴയില്‍ കാണാതായ സംഭവത്തിൽ നവദമ്പതികളുടെയും മൃതദേഹം കണ്ടെത്തി. കടയ്‌ക്കല്‍ സംബ്രമം സ്വദേശി സിദ്ദിക്ക്, ഭാര്യ ആയൂര്‍ കാരാളിക്കോണം സ്വദേശി നൗഫി എന്നിവരുടെ മൃതദേഹം ആണ് കണ്ടെത്തിയത്. ഇവർക്കൊപ്പം പുഴയിൽ വീണപള്ളിക്കല്‍ പകല്‍ക്കുറി ഇടവേലിക്കല്‍ പുത്തന്‍ വീട്ടില്‍ സെയിന് ലാബുദ്ദീന്‍ ഹസീന ദമ്പതികളുടെ മകന്‍ അന്‍സല്‍ (23) ന്റെ മൃതദേഹം ഇന്നലെ രാത്രി തന്നെ കണ്ടെത്തിയിരുന്നു. .
ഇന്നലെ രാത്രി 7 മണിയോടെയാണ് സംഭവം. പുഴ കാണാന്‍ പോയവര്‍ തിരികെ വരാത്തതിനെ തുടര്‍ന്നുന്നുള്ള അന്വേഷണത്തിലാണ് അപകടം പുറത്തറിയുന്നത്. ഈ മാസം 16 ന് ആയിരുന്നു സിദ്ദിക്കിന്റെയും നൗഫിയുടേയും വിവാഹം. വൈകുന്നേരത്തോടെയാണ് ഇരുവരും അന്‍സലിന്റെ വീട്ടില്‍ വിരുന്നിന് എത്തിയത്. തുടര്‍ന്ന് പുഴ കാണുന്നതിനായി പള്ളിക്കല്‍ പുഴയില്‍ എത്തി. പാറയില്‍ കയറി ഫോട്ടോ എടുക്കുന്നതിനിടയില്‍ ദമ്പതികള്‍ പുഴയില്‍ വീണു. അന്‍സില്‍ ഇവരെ രക്ഷിക്കാന്‍ ശ്രമിക്കുന്നതിനിടയില്‍ അപകടത്തില്‍ പെട്ടു എന്നുമാണ് വിവരം.
നാട്ടുകാരും ,പോലീസും ,ഫയര്‍ ഫോഴ്‌സും കാണാതായവര്‍ക്ക് വേണ്ടി രാത്രി വൈകിയും തെരച്ചില്‍ നടത്തിയിരുന്നു. മൃതദേഹങ്ങൾ പാരിപ്പള്ളി മെഡിക്കല്‍ കോളേജ് ആശുപത്രിയിലേക്ക് മാറ്റി.
