ബ്യൂണസ് ഐറിസ്: അണ്ടര്‍ 20 പുരുഷ ലോകകപ്പ് ഫുട്‌ബോളില്‍ നിന്ന് ആതിഥേയരായ അര്‍ജന്റീന പ്രീ ക്വാര്‍ട്ടറില്‍ പുറത്തായി. അതേസമയം ബ്രസീല്‍ ക്വാര്‍ട്ടറിലേക്ക് മുന്നേറി. ബ്രസീലിന് പുറമെ കൊളംബിയ, ഇറ്റലി, നൈജീരിയ ടീമുകളും അവസാന എട്ടില്‍ ഇടംപിടിച്ചു.
നൈജീരിയയോട് മറുപടിയില്ലാത്ത രണ്ട് ഗോളുകള്‍ക്ക് തോറ്റാണ് ആതിഥേയരായ അര്‍ജന്റീന പ്രീ ക്വാര്‍ട്ടറില്‍ പുറത്തായത്. മുന്‍ അര്‍ജന്റീന താരം ഹാവിയര്‍ മഷ്രാനോയുടെ ശിക്ഷണത്തിലിറങ്ങിയ അര്‍ജന്റീന മത്സരത്തിലുടനീളം ആധിപത്യം പുലര്‍ത്തിയിട്ടും ഗോള്‍ നേടാന്‍ മാത്രം സാധിച്ചില്ല. 26 തവണ ഷോട്ടുകളുതിര്‍ത്തിട്ടും അഞ്ചെണ്ണം മാത്രമാണ് ലക്ഷ്യത്തിലേക്ക് പാഞ്ഞത്. എന്നാല്‍ ഒരു ഷോട്ടുപോലും ഗോള്‍വലയിലെത്തിയില്ല. നൈജീരിയ ആവട്ടെ കിട്ടിയ അവസരങ്ങള്‍ മുതലാക്കുകയും ചെയ്തു.
ഗോള്‍രഹിതമായ ആദ്യ പകുതിക്ക് ശേഷം 61-ാം മിനിറ്റില്‍ ഇബ്രാഹിം ബെജി മുഹമ്മദിലൂടെയാണ് നൈജീരിയ ലീഡ് നേടിയത്. പിന്നീട് പരിക്ക് സമയത്ത് റില്‍വാനു സര്‍ക്കി ഗോള്‍ പട്ടിക പൂര്‍ത്തിയാക്കി.
ടുണീഷ്യയെ ഒന്നിനെതിരെ നാല് ഗോളുകള്‍ക്ക് തകര്‍ത്താണ് ബ്രസീല്‍ ക്വാര്‍ട്ടറിലേക്ക് കുതിച്ചത്. വിജയികള്‍ക്കുവേണ്ടി ആന്‍ഡ്രെ സാന്റോസ് രണ്ട് ഗോള്‍ നേടി. 31-ാം മിനിറ്റിലും പരിക്ക് സമയത്തിന്റെ പത്താം മിനിറ്റിലുമായിരുന്നു സാന്റോസിന്റെ ഗോള്‍. 11-ാം മിനിറ്റില്‍ പെനാല്‍റ്റിയിലൂടെ മാര്‍കസ് ലിയനാര്‍ഡോ, പരിക്ക് സമയത്തിന്റെ ആദ്യ മിനിറ്റില്‍ മാത്യൂസ് മാര്‍ട്ടിന്‍സ് എന്നിവരും കാനറികള്‍ക്കായി ലക്ഷ്യം കണ്ടു. മഹ്മൂദ് ഗോര്‍ബെല്ലിന്റെ വകയായിരുന്നു ടുണീഷ്യയുടെ ഏക ഗോള്‍. 45-ാം മനിറ്റില്‍ ബ്രസീലിയന്‍ താരം റോബര്‍ട്ട് റെനാന്‍ ചുവപ്പ് കാര്‍ഡ് കണ്ട് പുറത്തായെങ്കിലും മുതലാക്കാന്‍ ടുണീഷ്യക്ക് സാധിച്ചില്ല. ക്വാര്‍ട്ടറില്‍ ഇസ്രയേലാണ് ബ്രസീലിന്റെ എതിരാളി.
ഇറ്റലി ഒന്നിനെതിരെ രണ്ട് ഗോളിന് ഇംഗ്ലണ്ടിനെ തോല്‍പ്പിച്ചു. എട്ടാം മിനിറ്റില്‍ തൊമാസ് ബാള്‍ഡന്‍സിയുടെ ഗോളില്‍ ഇറ്റലി മുന്നിലെത്തി. എന്നാല്‍ 24-ാം മിനിറ്റില്‍ ആല്‍ഫി ഡിവൈനിലൂടെ ഇംഗ്ലണ്ടിന്റെ മറുപടി. 87-ാം മിനിറ്റില്‍ പെനാല്‍റ്റിയിലൂടെ സെസാറെ കസാഡെ ഇറ്റലിക്ക് വിജയം സമ്മാനിച്ചു. ക്വാര്‍ട്ടറില്‍ ഇറ്റലി കൊളംബിയയെ നേരിടും. മറ്റു മത്സരങ്ങളില്‍ യുഎസ്എ എതിരില്ലാത്ത നാല് ഗോളിന് ന്യൂസിലന്‍ഡിനെയും ഇസ്രയേല്‍ 1-0ന് ഏഷ്യന്‍ ചാമ്പ്യന്മാരായ ഉസ്ബെക്കിസ്ഥാനെയും കൊളംബിയ 5-1ന് സ്ലോവാക്യയെയും തകര്‍ത്താണ് അവസാന എട്ടിലേക്ക് കുതിച്ചത്.
