ന്യൂദല്ഹി: രാഷ്ട്ര സേവനത്തില് സര്ക്കാര് ഒമ്പത് വര്ഷം പൂര്ത്തിയാക്കിയ വേളയില് പ്രധാനമന്ത്രി നരേന്ദ്ര മോദി വിനയാന്വിതനായി നന്ദി അറിയിച്ചു. ഇന്ന് രാഷ്ട്രത്തിനായുള്ള സേവനത്തില് ബിജെപി നയിക്കുന്ന കേന്ദ്രസര്ക്കാര് ഒമ്പതു വര്ഷം പൂര്ത്തിയാക്കുന്നതില് എനിക്ക് വിനീതമായ നന്ദിയുണ്ടെന്ന് പ്രധാനമന്ത്രി നരേന്ദ്ര മോദി ട്വീറ്റ് ചെയ്തു.
സര്ക്കാര് എടുക്കുന്ന ഓരോ തീരുമാനവും നടപ്പാക്കുന്ന ഓരോ പ്രവര്ത്തനവും ജനങ്ങളുടെ ജീവിതം മെച്ചപ്പെടുത്താനുള്ള ആഗ്രഹത്താല് നയിക്കപ്പെടുന്നു. വികസിത ഇന്ത്യയെ കെട്ടിപ്പടുക്കാന് നാം കൂടുതല് കഠിനാധ്വാനം ചെയ്യുമെന്നും പ്രധാനമന്ത്രി പറഞ്ഞു. ഒമ്പതാം വാര്ഷിക പരിപാടികളുടെ ഭാഗമായി അടുത്ത മാസം 30 വരെ പാര്ട്ടി രാജ്യത്തുടനീളം നിരവധി പരിപാടികളും റാലികളും സംഘടിപ്പിക്കും.
ജില്ല, ബ്ലോക്ക്, ബൂത്ത് തലങ്ങളിലാകും പരിപാടികള് സംഘടിപ്പിക്കുക. പാര്ലമെന്റ് മണ്ഡലങ്ങളില് പ്രത്യേക പ്രചാരണ പരിപാടികള് നടത്തും. കേന്ദ്രമന്ത്രിമാരും ബിജെപി ഭാരവാഹികളും നേതാക്കളും പരിപാടികളില് പങ്കെടുക്കും. ഒരുമാസം നീണ്ടുനില്ക്കുന്ന പ്രചാരണത്തില് കേന്ദ്രസര്ക്കാരിന്റെ നയങ്ങളും നേട്ടങ്ങളും ജനങ്ങളിലെത്തിക്കുന്നതിന് മുന്ഗണന നല്കും.
