തിരുവനന്തപുരം: കെഎസ്ആര്ടിസി ബസില് യാത്ര ചെയ്യുന്നതിനിടെ ശരീരത്തില് മോശമായി സ്പര്ശിക്കുകയും സ്വയംഭോഗം ചെയ്യുകയും ചെയ്ത യുവാവിനെതിരേ കൂടുതല് യുവതികളുടെ പരാതി. മോശം അനുഭവത്തിന് ഇരയായ സിനിമ പ്രവര്ത്തക നന്ദിത ഇന്സ്റ്റഗ്രാമില് ഇയാളുടെ വീഡിയോ ഇട്ടതോടെയാണ് ഇതു കണ്ട് നന്ദിതയ്ക്ക് അഞ്ചിലധികം യുവതികള് സന്ദേശം അയച്ചത്. കോഴിക്കോട് കായക്കൊടി കാവില് സവാദ് ഷാ തങ്ങളോടും മോശമായി പെരുമാറിയിട്ടുണ്ടെന്ന് അഞ്ച് പെണ്കുട്ടികള് തനിക്ക് മെസേജ് അയച്ചിരുന്നു. തൃശൂര്-എറണാകുളം റൂട്ടാണ് ഇയാള് ഇതിനായി തിരഞ്ഞെടുക്കുന്നതെന്നും നന്ദിത പറഞ്ഞു.
ഇന്സ്റ്റഗ്രാമില് നന്ദിത പങ്കുവച്ച വിഡിയോ 12 ലക്ഷത്തിലധികം പേരാണ് വിഡിയോ കണ്ടത്. ചൊവ്വാഴ്ചയാണ് കെഎസ്ആര്ടിസി ബസില് യാത്ര ചെയ്യുന്നതിനിടെ കോഴിക്കോട് കായക്കൊടി കാവില് സവാദില് (27)നിന്നു നന്ദിതയ്ക്ക് മോശം അനുഭവം ഉണ്ടായത്. അറസ്റ്റിലായ സവാദിനെ കോടതി 14 ദിവസത്തേയ്ക്കു റിമാന്ഡ് ചെയ്തിട്ടുണ്ട്. ‘ഞാന് തൃശൂരില് നിന്ന് എറണാകുളത്തേക്ക് പോവുകയായിരുന്നു. അങ്കമാലി എത്തുന്നത് മുന്പ് തന്നെ ഞാന് ഉറങ്ങിയിരുന്നു. ഇതിനിടയ്ക്ക് എന്റെയും മറ്റൊരു പെണ്കുട്ടിയുടെയും നടുവിലായി അയാള് വന്നിരുന്നു. എവിടേക്കാണ് പോകുന്നത് ? ബ്ലോക്ക് ഉണ്ടാകുമോ? തുടങ്ങിയ ചോദ്യങ്ങള് ചോദിച്ച് അയാള് ചെറിയ സംഭാഷണം നടത്തി. കുറച്ചുകഴിഞ്ഞപ്പോള് അയാള് എന്റെ ശരീരത്തില് സ്പര്ശിച്ചതായി തോന്നി. ഞാന് നോക്കിയപ്പോള് മറ്റൊരു കൈ അയാളുടെ പാന്റിനകത്തായിരുന്നു.
കുറച്ചുകഴിഞ്ഞപ്പോള് ഇയാള് ലൈംഗികചേഷ്ടകള് തുടങ്ങി. ആദ്യം ഒന്നും കാണാത്തതുപോലെ ജനലിന് പുറത്തേക്ക് നോക്കിയിരുന്നു. എന്നാല് ഇയാള് ഇത് തുടര്ന്നതോടെ ഞാന് എന്റെ സുഹൃത്തിനെ ഫോണില് ചാറ്റിലൂടെ കാര്യങ്ങള് പറഞ്ഞു. സുഹൃത്തിന്റെ നിര്ദേശപ്രകാരമാണ് ഞാന് വിഡിയോ എടുത്തതും പ്രതികരിച്ചതെന്നും നന്ദിത പറഞ്ഞു. ബസ് നിര്ത്തിയ സ്ഥലത്ത് രണ്ട് പൊലീസുകാര് ഉണ്ടായിരുന്നു. അവരെ അറിയിക്കാനായി കണ്ടക്ടര് പ്രദീപ് ചേട്ടന് പോകാനൊരുങ്ങി. തെറ്റ് ചെയ്തിട്ടില്ലെന്നും താനെന്തിന് ഓടണം എന്നായിരുന്നു ആദ്യം പ്രതി പറഞ്ഞത്. എന്നാല് ബസിന്റെ ഡോര് തുറന്നതോടെ കണ്ടക്ടറെ തള്ളിയിട്ട് ഇയാള് ഓടുകയായിരുന്നു. ഒടുവില് െ്രെഡവറും കണ്ടക്ടറും ചേര്ന്നാണ് പ്രതിയെ പിടികൂടിയത്. ബസില് ഒരു നിയമവിദ്യാര്ഥിനി മാത്രമാണ് കേസില് സാക്ഷിയാകാമെന്ന് പറഞ്ഞ് മുന്നോട്ടുവന്നത്. ബാക്കിയാരും പ്രതികരിക്കാനോ സഹായിക്കാനോ എത്തിയില്ലെന്നും നന്ദിത പറഞ്ഞു. യുവാവിന്റെ മുഖം മറയ്ക്കാതെ വിഡിയോ ഇട്ടതില് ഖേദമില്ലെന്നും നന്ദിത പ്രതികരിച്ചു.
