തിരുവനന്തപുരം: കേരള വ്യവസായ സൗഹൃദ സംസ്ഥാനമെന്ന് പിണറായിസര്‍ക്കാരും വ്യവസായമന്ത്രി പി.രാജീവും കൊട്ടിഘോഷിക്കുമ്പോള്‍ അതിനെതിരെ ചില അപ്രിയസത്യങ്ങള്‍ പറഞ്ഞ് കെ.ബി. ഗണേഷ് കുമാര്‍ എംഎല്‍എ.
സര്‍ക്കാര്‍ കേരളത്തെ വ്യവസായസൗഹൃദ സംസ്ഥാനമെന്ന് കൊട്ടിഘോഷിക്കുമ്പോഴും കേരളത്തില്‍ വ്യവസായം തുടങ്ങി വെട്ടിലായ പ്രവാസികളുടെ എണ്ണം കൂടുതലാണ്. ആന്തൂര്‍ സാജനെപ്പോലുള്ളവര്‍ക്ക് ആത്മഹത്യ ചെയ്യേണ്ട അവസ്ഥപോലും ഉണ്ടായി. – ഗണേഷ് കുമാര്‍ പറഞ്ഞു. സൗദി അറേബ്യയിലെ റിയാദില്‍ കൊട്ടാരക്കര പ്രവാസി അസോസിയേഷന്റെ മൂന്നാം വാര്‍ഷിക പരിപാടിയില്‍ പങ്കെടുത്ത് സംസാരിക്കുകയായിരുന്നു ഗണേഷ് കുമാര്‍.
കേരളത്തില്‍ ആരും ബിസിനസ് സംരംഭങ്ങള്‍ ആരംഭിക്കരുതെന്നും ഉള്ള പണം ബാങ്കുകളില്‍ നിക്ഷേപിക്കലാണ് ബുദ്ധി. പ്രവാസികള്‍ ഇപ്പോള്‍ നില്‍ക്കുന്നത് പൊന്മുട്ടയിടുന്ന താറാവുള്ള സ്ഥലത്താണെന്നും എന്നാല്‍ നാട്ടിലെത്തിയാല്‍ ചവിട്ടു കിട്ടുന്ന താറാവാകുമെന്നും ഗണേഷ് കുമാര്‍ പറഞ്ഞു.
