അബുദാബി: എഐഎം ഫൗണ്ടേഷന്‍ സംഘടിപ്പിക്കുന്ന വാര്‍ഷിക നിക്ഷേപ സമ്മേളനം 2023 യുഎഇയിലെ അബുദാബി നാഷണല്‍ എക്സിബിഷന്‍ സെന്ററില്‍ ആരംഭിച്ചു. ‘നിക്ഷേപ സമീപനത്തിലെ അടിസ്ഥാനപരമായ മാറ്റം; സുസ്ഥിര സാമ്പത്തിക വളര്‍ച്ച, വൈവിധ്യം, സമൃദ്ധി എന്നിവ പ്രോത്സാഹിപ്പിക്കുന്നതിനുള്ള ഭാവി നിക്ഷേപ അവസരങ്ങള്‍’ എന്ന പ്രമേയത്തിലാണ് സമ്മേളനം.
ആദ്യ ദിനത്തില്‍, യുഎഇയിലെ ഇന്ത്യന്‍ അംബാസഡര്‍ സഞ്ജയ് സുധീര്‍, ലുലു ഗ്രൂപ്പ് ചെയര്‍മാന്‍ എം എ യൂസഫ് അലി, പ്രിന്‍സിപ്പല്‍ സെക്രട്ടറി കെ എസ് ശ്രീനിവാസ് എന്നിവരുടെ സാന്നിധ്യത്തില്‍ വ്യവസായ, ആഭ്യന്തര വ്യാപാര പ്രോത്സാഹന വകുപ്പ് സെക്രട്ടറി രാജേഷ് കുമാര്‍ സിംഗ് കേരള പവലിയന്‍ ഉദ്ഘാടനം ചെയ്തു.
നിക്ഷേപ കേന്ദ്രമെന്ന നിലയില്‍ കേരളത്തിലെ നിക്ഷേപ സാധ്യതകള്‍ പവലിയനില്‍ പ്രദര്‍ശിപ്പിച്ചു, കൂടാതെ കേരള സ്റ്റാര്‍ട്ടപ്പ് മിഷന്‍ എട്ട് സ്റ്റാര്‍ട്ടപ്പുകളെ നിക്ഷേപകരെ കണ്ടെത്താന്‍ എത്തിച്ചു. സംസ്ഥാനത്തെ സാങ്കേതിക സ്റ്റാര്‍ട്ടപ്പുകളെ പിന്തുണയ്‌ക്കുന്ന നോഡല്‍ ഏജന്‍സിയാണ് കേരള സ്റ്റാര്‍ട്ടപ്പ് മിഷന്‍. വാര്‍ഷിക നിക്ഷേപ യോഗത്തില്‍ കേരള സര്‍ക്കാരാണ് ഗോള്‍ഡ് സ്‌പോണ്‍സര്‍.
ഗൈഡന്‍സ് തമിഴ്നാട്, വാര്‍ഷിക നിക്ഷേപ സമ്മേളനം 2023-ല്‍ നിക്ഷേപക പ്രോത്സാഹന അവാര്‍ഡിന് നാമനിര്‍ദ്ദേശം ചെയ്യപ്പെട്ടു. തമിഴ്നാട് സര്‍ക്കാരിന്റെ നിക്ഷേപ പ്രോത്സാഹന ഏജന്‍സിയാണ് ഗൈഡന്‍സ് തമിഴ്നാട്. വരാനിരിക്കുന്ന നിക്ഷേപകരിലേക്ക് എത്തിച്ചേരാനും അവരെ തമിഴ്നാട്ടില്‍ നിക്ഷേപം നടത്താനുമാണ് ഈ ഏജന്‍സി രൂപീകരിച്ചിരിക്കുന്നത്.
