തിരുവനന്തപുരം: സിനിമാ സെറ്റുകളിലെ മോശം പെരുമാറ്റത്തെക്കുറിച്ച് പരാതികള് ലഭിച്ചതിനെ തുടര്ന്ന് വിലക്കേര്പ്പെടുത്തിയതിനെതിരെ താരസംഘടനയായ അമ്മയെ സമീപിച്ച് നടന് ഷെയ്ന് നിഗം. തനിക്കെതിരെ നടത്തിയ ആരോപണങ്ങള് അടിസ്ഥാനരഹിതമാണെന്നും വേനിപ്പിക്കുന്നതാണെന്നും ഷെയ്ന് നിഗം പറഞ്ഞു. ചിത്രത്തിന്റെ എഡിറ്റിംഗ് കാണണമെന്ന് പറഞ്ഞിട്ടില്ലെന്നും ഷെയ്ന് വ്യക്തമാക്കി. സിനിമയില് മൂന്ന് പ്രധാന കഥാപാത്രങ്ങളാണ് ഉള്ളത്. അതില് ഒരാളാകാന് താത്പര്യമില്ലെന്ന് നേരത്തെ പറഞ്ഞിരുന്നു. എന്നാല് താന് അവതരിപ്പിക്കുന്ന റോബര്ട്ട് എന്ന കഥാപാത്രമാണ് നായകന് എന്നാണ് സംവിധായകന് പറഞ്ഞത്. സിനിമയുടെ ചിത്രീകരണത്തിന് ശേഷം അതില് സംശയം തോന്നി. തുടര്ന്ന് സംവിധായകനോട് അതേക്കുറിച്ച് ചോദിച്ചപ്പോള് അദ്ദേഹമാണ് എഡിറ്റിംഗ് കാണാമെന്ന് പറഞ്ഞത് എന്നും ഷെയ്ന് നിഗം വ്യക്തമാക്കി.
സിനിമയ്ക്ക് വേണ്ടി താന് നല്കിയ സമയം നീണ്ടുപോയിരുന്നു. അതിനാലാണ് കൂടുതല് പണം ആവശ്യപ്പെട്ടത്. ആര്.ഡി.എക്സിന് ശേഷം താന് അഭിനയിക്കേണ്ടിയിരുന്ന മറ്റൊരു ചിത്രം നീണ്ടുപോയി. അതിനാല് മറ്റൊരു ചിത്രത്തിന് മുന്കൂറായി വാങ്ങിയ പണം തിരികെ നല്കേണ്ടിവന്നു. നിര്മാതാവിന്റെ ഭര്ത്താവ് തന്റെ അമ്മയോട് ബഹുമാനമില്ലാതെ പെരുമാറി. അതേ തുടര്ന്നാണ് അമ്മ ക്ഷോഭിച്ചത് എന്നും ഷെയ്ന് പറഞ്ഞു.
ഷെയ്ന് നിഗത്തിനെതിരേ സിനിമ സംഘടനകള് നടപടി സ്വീകരിക്കാന് കാരണമായ വിവാദങ്ങളില് ഒന്നായ നിര്മാതാവ് സോഫിയ പോളിന് അയച്ച ഇ-മെയില് പുറത്തായിരുന്നു. ഇതിനു പിന്നാലെയാണ് നടന്റെ പ്രതികരണം. ഷെയ്ന് നിഗം പുതിയ സിനിമയുടെ ഷൂട്ടിങ് പകുതിയിലെത്തിയപ്പോള് എഡിറ്റ് ചെയ്ത രൂപം കാണണമെന്ന് ആവശ്യപ്പെടുകയും തനിക്ക് കൂടുതല് പ്രാധാന്യം വേണമെന്ന് നിര്ബന്ധം പിടിക്കുകയും ചെയ്യുന്നതിന്റെ തെളിവുകള് ഉള്പ്പെടെ പരാതി ലഭിച്ചിരുന്നു. ഇതിനു പിന്നാലെയാണാ ആര്.ഡി.എക്സ് സിനിമയുടെ നിര്മാതാവ് സോഫിയ പോളിന് ഷെയ്ന് അയച്ച വിവാദ കത്തിന്റെ വിശദാംശങ്ങള് പുറത്ത് വന്നിരിക്കുകയാണ്. ആര്.ഡി.എക്സ് സിനിമയില് തന്റെ കഥാപാത്രത്തിന് കൂടുതല് പ്രധാന്യം നല്കണമെന്നാണ് ഷെയിനിന്റെ നിബന്ധന. ചിത്രത്തില് ആന്റണി പെപ്പെ, നീരജ് മാധവ് എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. വാഗ്ദാനം ചെയ്തത് പോലെ തന്റെ കഥാപാത്രത്തിന് സിനിമയില് പ്രധാന്യം ലഭിക്കുന്നില്ല. സിനിമയില് താന് തന്നെയായിരിക്കണം നായകന്. മാര്ക്കറ്റിങ്ങിലും ബ്രാന്ഡിങ്ങിലും തന്നെ പ്രധാന കഥാപാത്രമായി അവതരിപ്പിക്കണം. സിനിമയുടെ എഡിറ്റിങ്ങിലും തനിക്ക് പ്രധാന്യം നല്കണം. ടീസറിലും പോസ്റ്ററിലും തനിക്ക് തന്നെ പ്രധാന്യം നല്കണം. ജനങ്ങള്ക്ക് താനാണ് നായകനെന്ന് തോന്നണം ഇതാണ് കത്തിന്റെ ഉള്ളടക്കം.
സിനിമാ സെറ്റില് അച്ചടക്കമില്ലാതെ പെരുമാറിയതിനെ തുടര്ന്ന് നടന്മാരായ ഷെയ്ന് നിഗം, ശ്രീനാഥ് ഭാസി എന്നിവരുമായി സഹകരിക്കില്ലെന്ന് സിനിമാ സംഘടനകള് പ്രഖ്യാപിച്ചിരിക്കുകയാണ്. ഇരുവര്ക്കുമെതിരേ ഒട്ടേറെ പരാതികളാണ് ഫെഫ്കയിലും നിര്മാതാക്കളുടെ സംഘടനകളിലും ലഭിച്ചിരിക്കുന്നത്.
