മാവേലിക്കര: ഡിവൈഎഫ്ഐ നേതാവിനുനേരെ വധശ്രമം. മാവേലിക്കര മാങ്കാംകുഴി മേഖലാ സെക്രട്ടറി ഷഹനാസിന് (35) നേരെയാണ് തലക്കടിച്ച് കൊല്ലാന്‍ ശ്രമിച്ചത്. ഇന്നലെ രാത്രി 8.30ന് വെട്ടിയാര്‍ കിഴക്ക് ജുമാ മസ്ജിദിന് സമീപത്തുവച്ച് ആയുധങ്ങളുമായി എത്തിയ ഒരു സംഘം തന്നെ ആക്രമിക്കുകയായിരുന്നുവെന്ന് ഷഹനാസ് പറഞ്ഞു.
തന്നെ ആക്രമിച്ചവര്‍ എസ്ഡിപിഐ പ്രവര്‍ത്തകരാണെന്നും ഷഹനാസ് വ്യക്തമാക്കി. തലയ്‌ക്ക് ഗുരുതര പരിക്കേറ്റതിനെ തുടര്‍ന്ന് മാവേലിക്കര ജില്ലാ ആശുപത്രിയില്‍ പ്രവേശിപ്പിച്ചിരിക്കുകയാണ് ഇയാളെ. എസ്ഡിപിഐ പ്രവര്‍ത്തകരാണ് ആക്രമണത്തിന് പിന്നിലെന്ന് ഡിവൈഎഫ്ഐ മാവേലിക്കര ബ്ലോക്ക് കമ്മിറ്റിയും പ്രതികരിച്ചു. പ്രതികളെ ഉടന്‍ പിടികൂടണമെന്ന് സിപിഐഎം മാവേലിക്കര ഏരിയ കമ്മിറ്റി ആവശ്യപ്പെട്ടു.
