വാഷിങ്ടണ് : മൈക്രോ ബ്ലോഗിങ് സൈറ്റായ ട്വിറ്ററിന്റെ ലോഗോയില് മാറ്റം. ട്വിറ്റര് സിഇഒ ഇലോണ് മസ്ക് തന്നെയാണ് ഇക്കാര്യം അറിയിച്ചിരിക്കുന്നത്. ബ്ലൂ ബേര്ഡ് ലോഗോ മാറ്റി ഷിബ ഇനു നായയുടെ (‘ഡോഗ് മീം) ചിത്രമാണ് പുതിയ ലോഗോ.
ഇലോണ് മാസ്കിന്റെ ഏറ്റവും ഇഷ്ടപ്പെട്ട ക്രിപ്റ്റോ കറന്സിയാണ് ഡോഗ് കോയിന്. ഷിബ ഇനു എന്ന നായ ഇന്റര്നെറ്റിലെ ഒരു ജനപ്രിയ മീം ആണ്. ഇതാണ് ഡോഗ് കോയിനിന്റെ ലോഗോ. ക്രിപ്റ്റോ കറന്സിയുടെ ലോഗോയുടെ ഭാഗമായാണ് ഡോഗ് മീം ഇതുവരെ കണ്ടിട്ടുള്ളത്.
ലോഗോയില് മാറ്റം വരുത്തുന്നതായി അറിയിച്ചെങ്കിലും ട്വിറ്ററിന്റെ മൊബൈല് ആപ്പില് മാറ്റമൊന്നും ഉണ്ടായിട്ടില്ല. എന്നാല് മസ്കിന്റെ ട്വീറ്റിന് ശേഷം ഡോഗ്കോയിന് ഏകദേശം 30 ശതമാനം ഉയര്ന്നതായി ബ്ലൂംബെര്ഗ് റിപ്പോര്ട്ട് ചെയ്യുന്നു.
ലോഗോ മാറ്റിയത് സംബന്ധിച്ച് ഉപയോക്താക്കളില് നിന്നും ചോദ്യം ഉയര്ന്നതോടെ ഇത് തമാശാക്കികൊണ്ടുള്ള രണ്ട് ട്വീറ്റുകും മസ്ക് നല്കുകയായിരുന്നു. എന്നാല് ചരക്കുകള്ക്കുള്ള പേയ്മെന്റായി ടെസ്ല ഡോഗ്കോയിനെ സ്വീകരിക്കുന്നുവെന്നും സ്പേസ് എക്സ് ഉടന് തന്നെ ഇതാരംഭിക്കുമെന്നും മസ്ക് നേരത്തെ അറിയിച്ചിട്ടുണ്ട്.
