ബംഗളൂരു: വിവാഹം കഴിക്കുന്നതിൽ നിന്നും പിന്മാറിയതിന് കാമുകിയെ നാട്ടുകാരുടെ മുന്നിലിട്ട് യുവാവ് കുത്തിക്കൊന്നു. ബംഗളൂരുവിലെ മുരുകേഷ്പാല്യയില് ഇന്നലെ രാത്രി ഏഴരയോടെയായിരുന്നു സംഭവം. ആന്ധ്രാപ്രദേശിലെ കകിനാദ സ്വദേശി ലീല പവിത്ര നാലാമതി (25) ആണ് കൊല്ലപ്പെട്ടത്. സംഭവത്തിൽ ആന്ധ്രാപ്രദേശ് ശ്രീകാകുളം സ്വദേശി ദിനകര് ബനാല (28)യെ പോലീസ് അറസ്റ്റ് ചെയ്തു.
മുരുകേഷ്പാല്യയിലെ ഒമേഗ ഹെല്ത്ത് കെയര് സ്ഥാപനത്തിലെ ജീവനക്കാരിയായിരുന്ന യുവതിയുടെ ഓഫീസിന് മുന്നിൽ വച്ചായിരുന്നു കൊലപാതകം. ഓഫീസിന് മുന്നില് ദിനകര് എത്തുകയും ഇരുവരും തമ്മില് വാക്കുതര്ക്കം ഉണ്ടാവുകയും ചെയ്തു. ഇതിനിടെ ആളുകള് നോക്കിനില്ക്കെ കയ്യില് കരുതിയിരുന്ന കത്തിയെടുത്ത് ദിനകര് 16 തവണയോളം യുവതിയെ കുത്തികൊലപ്പെടുത്തുകയായിരുന്നു.
അഞ്ചുവര്ഷമായി ഇരുവരും പ്രണയത്തിലായിരുന്നു. വിവാഹം കഴിക്കാനും തീരുമാനിച്ചിരുന്നു. എന്നാല് ദിനകര് താഴ്ന്ന ജാതിയില്പ്പെട്ടയാളായതിനാല് ലീലയുടെ വീട്ടുകാര് ബന്ധത്തെ എതിര്ത്തു. തുടര്ന്ന് വീട്ടുകാര് ബന്ധത്തിന് എതിരാണെന്നും അവരുടെ തീരുമാനം അനുസരിക്കുമെന്നും ലീല ദിനകറിനെ അറിയിച്ചു. എന്നാൽ അഞ്ച് വർഷത്തോളം പ്രണയിച്ചിട്ട് വിവാഹക്കാര്യം പറഞ്ഞപ്പോൾ താഴ്ന്നജാതിയാണെന്ന് പറഞ്ഞ് ലീല തന്നെ പരിഹസിച്ചെന്നാണ് യുവാവ് പറയുന്നത്.
