ശ്രീനഗര് : ജമ്മുകശ്മീര് പുല്വാമയിലുണ്ടായ ഏറ്റുമുട്ടലില് സുരക്ഷാ സൈന്യം ഒരു ഭീകരനെ വധിച്ചു. ലഷ്കര് ഭീകരന് അഖിബ് മുസ്താഖ് ഭട്ടാണ് കൊല്ലപ്പെട്ടത്. ഏറ്റുമുട്ടലില് ഒരു സൈനികന് വീരമൃത്യൂ വരിച്ചു. ഒരു സൈനികന് പരിക്കേറ്റിട്ടുണ്ട്. അവന്തിപ്പോരയില് ചൊവ്വാഴ്ച പുലര്ച്ചയോടെയാണ് ഏറ്റുമുട്ടല് ഉണ്ടായത്.
പ്രദേശത്ത് ഭീകരരുടെ സാന്നിധ്യമുള്ളതായി വിവരം ലഭിച്ചതിനെ തുടര്ന്നാണ് സുരക്ഷാ സൈന്യം ഇവിടെ തെരച്ചില് നടത്തിയത്. അതിനിടെ ഭീകരര് വെടിയുതിര്ക്കുകയും സൈന്യം തിരിച്ചടിക്കുകയുമായിരുന്നു.
അതേസമയം കഴിഞ്ഞ ദിവസം ബാങ്ക് സുരക്ഷാ ജീവനക്കാരനായ സഞ്ജയ് ശര്മ്മയെ(40)കൊലപ്പെടുത്തിയ ഭീകരനെയാണ് സൈന്യം വധിച്ചതെന്നും റിപ്പോര്ട്ടുകള് പുറത്തുവന്നിട്ടുണ്ട്. ഞായറാഴ്ച താമസസ്ഥലമായ അചാനില് നിന്ന് ചന്തയിലേക്കു പോകും വഴി ഭീകരന് സഞ്ജയ്ക്കു നേരെ വെടിയുതിര്ത്ത് കൊലപ്പെടുത്തുകയായിരുന്നു.
