മഹാഭാരതത്തിലെ ശകുന്തളദുഷ്യന്തന് പ്രണയകഥയായ ‘അഭിജ്ഞാന ശാകുന്തളം’ എന്ന കൃതിയെ ആസ്പദമാക്കി ഒരുങ്ങുന്ന ചിത്രം ശാകുന്തളത്തിന്റെ പുതിയ റിലീസ് തീയതി പ്രഖ്യാപിച്ചു. ചിത്രം ഏപ്രില് 14ന് തീയേറ്ററുകളില് എത്തും. ചിത്രം 3ഉയിലും റിലീസ് ചെയ്യും. കാഴ്ചക്കാര്ക്ക് പുതിയതും ആകര്ഷകവുമായ ഒരു അനുഭവം ഉറപ്പാക്കാനായി നിര്മ്മാതാക്കള് ഈ ചിത്രം 3ഡിയിലും റിലീസ് ചെയ്യാന് തീരുമാനിച്ചിരിക്കുകയാണ്.
ചിത്രത്തില് നടി സാമന്ത ശകുന്തളയായി എത്തുമ്പോള് സൂഫിയും സുജാതയും എന്ന ചിത്രത്തിലൂടെ ശ്രദ്ധേയനായ ദേവ് മോഹനാണ് ദുഷ്യന്തനാവുന്നത്. ഗുണശേഖറാണ് ചിത്രം തിരക്കഥയെഴുതി സംവിധാനം ചെയ്യുന്നത്. സ്ത്രീപക്ഷ സിനിമകളില് വച്ച് വലിയ ബജറ്റിലാണ് ഈ ചിത്രം ഒരുങ്ങുന്നത്.
അദിതി ബാലന് അനസൂയായും മോഹന് ബാബു ദുര്വാസാവ് മഹര്ഷിയായും എത്തുമെന്നാണ് റിപ്പോര്ട്ട്. കൂടാതെ സച്ചിന് ഖേദേക്കര് കബീര് ബേദി, മധുബാല, ഗൗതമി, അനന്യ നാഗല്ല, ജിഷു സെന്ഗുപ്ത എന്നിവരടങ്ങുന്ന ഒരു മികച്ച താരനിരയും ചിത്രത്തിലുണ്ട്. ഐക്കണ് സ്റ്റാര് അല്ലു അര്ജുന്റെ മകള് അല്ലു അര്ഹയും ചിത്രത്തില് ഒരു പ്രധാന വേഷം ചെയ്യുന്നു എന്നതാണ് താരനിരയിലെ മറ്റൊരു ആകര്ഷണം.
മണി ശര്മയാണ് സംഗീത സംവിധാനം. ശേഖര് വി ജോസഫ് ഛായാഗ്രഹണവും പ്രവീണ് പുഡി എഡിറ്റിങ്ങും നിര്വഹിക്കുന്നു. ദില് രാജു അവതരിപ്പിക്കുന്ന ചിത്രം ഗുണാ ടീംവര്ക്സിന്റെ ബാനറില് നീലിമ ഗുണയാണ് നിര്മിക്കുന്നത്. തെലുങ്കിന് പുറമേ മലയാളം, തമിഴ്, കന്നഡ, ഹിന്ദി ഭാഷകളില് ചിത്രം മൊഴിമാറിയെത്തും.
