ചെന്നൈ: പ്രശസ്ത പിന്നണി ഗായിക വാണി ജയറാമിന്റെ മരണം ടീപ്പോയില്‍ തലയടിച്ച് വീണത് മൂലമെന്ന് സംശയം. ശനിയാഴ്ച രാവിലെ ചെന്നൈയിലെ നുങ്കംപാക്കത്തുള്ള വസതിയില്‍ നിലത്തുവീണു കിടക്കുന്ന നിലയിലാണ് ഇവരെ കണ്ടെത്തിയത്.
വാണി ജയറാം കഴിഞ്ഞ മൂന്ന് വര്‍ഷമായി വാണി ജയറാം ഒറ്റയ്‌ക്കായിരുന്നു താമസം. ഭര്‍ത്താവിന്റെ വേര്‍പാടിന് ശേഷമാണ് ഒറ്റയ്‌ക്ക് താമസം തുടങ്ങിയത്. ശനിയാഴ്ച രാവിലെ വീട്ടുവേലക്കാരി എത്തി വിളിച്ചപ്പോള്‍ വാതില്‍ തുറക്കാത്തതിനെ തുടര്‍ന്ന് അവര്‍ അയല്‍ക്കാരെയും ബന്ധുക്കളെയും വിവരം അറിയിച്ചു.
ബന്ധുക്കള്‍ വിളിച്ചിട്ടും വാതില്‍ തുറക്കാതായപ്പോള്‍ പൊലീസിനെ വിളിച്ചു. വാതില്‍ തകര്‍ത്തു. വീട്ടില്‍ തറയില്‍ വീണുകിടക്കുന്ന നിലയിലാണ് വാണി ജയറാമിനെ കണ്ടെത്തിയത്. നെറ്റി മുറിഞ്ഞതായി പറയുന്നു. വീണപ്പോള്‍ ടീപ്പോയില്‍ തലയിടിച്ചതാകാം കാരണമെന്ന് പറയുന്നു.
കട്ടിലിന് സമീപത്ത് തന്നെയായിരുന്നു ടീപ്പോയ്. പൊലീസ് അന്വേഷണം ആരംഭിച്ചിട്ടുണ്ട്. മൃതദേഹം പോസ്റ്റ് മോര്‍ട്ടത്തിനായി സര്‍ക്കാര്‍ ആശുപത്രിയിലേക്ക് മാറ്റി.
