ഭുവനേശ്വര് : പൊതുപരിപാടിക്കിടെ ഒഡീഷ ആരോഗ്യമന്ത്രിക്ക് വെടിയേറ്റു. ജാര്സുഗുഡ ബ്രജ്രാജ് നഗറിലെ പരിപാടിയില് പങ്കെടുക്കാന് കാറില് പോകവേയാണ് ബിജു ജനതാദള് നേതാവ് കൂടിയായ നബ കിഷോര് ദാസിന് വെടിയേറ്റത്. ഒഡിഷ പോലീസ് എഎസ്ഐ ഗോപാല് ദാസാണ് വെടിയുതിര്ത്തത്.
ഗോപാല് ദാസ് നിലവില് പോലീസ് കസ്റ്റഡിയിലാണ്. ബ്രജ്രാജ് മുനിസിപ്പലിറ്റി ചെയര്മാന്റേയും വൈസ് ചെയര്മാന്റേയും ഓഫീസ് ഉദ്ഘാടനത്തിനായി എത്തിയതാണ് ആരോഗ്യമന്ത്രി. കാറില് നിന്നും ഇറങ്ങവേ ഗോപാല് ദാസ് ഔദ്യോഗിക റിവോള്വര് ഉപയോഗിച്ച് തൊട്ടടുത്ത് നിന്ന് വെടിയുതിര്ക്കുകയായിരുന്നു. നബ കിഷോര് ദാസിന്റെ നെഞ്ചിലായി രണ്ട് തവണ വെടിയുതിര്ത്തെന്നും പോലീസ് പറഞ്ഞു.
ആരോഗ്യ മന്ത്രിയെ പ്രാഥമിക ചികിത്സയ്ക്ക് ആശുപത്രിയില് പ്രവേശിപ്പിച്ചിരിക്കുകയാണ്. നിലവില് ഗുരുതരാവസ്ഥയിലാണ്. വിദഗ്ധ ചികിത്സയ്ക്കായി മന്ത്രിയെ വ്യോമ മാര്ഗം മാറ്റുമെന്നാണ് ഇവിടെ നിന്നുള്ള വിവരം. സംസ്ഥാനത്ത് ബിജെഡി പാര്ട്ടിയുടെ മുതിര്ന്ന നേതാവ് കൂടിയാണ് നബ കിഷോര് ദാസ്. ഇദ്ദേഹത്തിന് വെടിയേറ്റതില് പാര്ട്ടി പ്രവര്ത്തകര് സ്ഥലത്ത് പ്രതിഷേധിക്കുന്നുണ്ട്. വെടിയുതിര്ത്ത എഎസ്ഐ മന്ത്രിയുടെ സുരക്ഷാ ചുമതലയിലുണ്ടായിരുന്ന ഉദ്യോഗസ്ഥനാണ്. അതേസമയം വെടിവെക്കാനുണ്ടായ കാരണം പോലീസ് വെളിപ്പെടുത്തിയിട്ടില്ല. ഗോപാല് ദാസിനെ കസ്റ്റഡിയില് വെച്ച് ചോദ്യം ചെയ്യുകയാണ്.
