ചെന്നൈ: ക്ഷേത്രത്തിലെ ഉത്സവവുമായി ബന്ധപ്പെട്ട ചടങ്ങുകള്ക്കിടെ ക്രെയിന് മറിഞ്ഞുവീണ് 4 പേര്ക്ക് ദാരുണാന്ത്യം. ഒമ്പത് പേർക്ക് പരുക്കേറ്റു. കീഴ് വീഥി ഗ്രാമത്തില് മന്തി അമ്മന് ക്ഷേത്രത്തില് നടന്ന ദ്രൗപതി അമ്മന് ഉത്സവത്തിനിടെയാണ് അപകടമുണ്ടായത്.
വിഗ്രഹങ്ങള്ക്ക് ക്രെയിനില് തൂങ്ങി കിടന്ന് മാല ചാര്ത്തുന്ന ചടങ്ങിനിടെ മൂന്നുപേര് കയറിയ ക്രെയിന് നിയന്ത്രണം നഷ്ടപ്പെട്ട് മറിഞ്ഞുവീഴുകയായിരുന്നു. മൂന്നു പേരും സംഭവസ്ഥലത്തു തന്നെ മരിച്ചതായാണ് വിവരം. ഗുരുതരമായി പരുക്കേറ്റവരെ അറക്കോണത്തും തിരുവള്ളൂരുമുള്ള സര്ക്കാര് ആശുപത്രികളില് പ്രവേശിപ്പിച്ചു. സംഭവത്തില് പോലീസ് അന്വേഷണം ആരംഭിച്ചു.
മുത്തു കുമാര്, ഭൂപാലന്, ജ്യോതിബാബു എന്നിവരാണ് മരിച്ചത്. ഒരാളെ തിരിച്ചറിഞ്ഞിട്ടില്ല. അപകടത്തിന്റെ ദൃശ്യങ്ങള് ഉത്സവം കാണാനെത്തിയ ആളുകള് പകർത്തിയിരുന്നു. ഇവ ഇപ്പോള് സാമൂഹ്യ മാധ്യമങ്ങളിൽ പ്രചരിക്കുന്നുണ്ട്.
