ന്യൂദല്ഹി: ഭൗമപ്രതിഭാസത്തെത്തുടര്ന്ന് വിള്ളല് വീണ ഉത്തരാഖണ്ഡിലെ ജോഷിമഠില് കൂടുതല് കെട്ടിടങ്ങള് അപകടാവസ്ഥയില്. കഴിഞ്ഞ ദിവസങ്ങളില് മഴയും മഞ്ഞുവീഴ്ചയും വര്ധിച്ചതാണ് കാരണം. വിള്ളലുകള് കണ്ടെത്തിയ ആകെ കെട്ടിടങ്ങളുടെ എണ്ണം 863 ആണ്. ഇതില് 181 കെട്ടിടങ്ങള് സുരക്ഷിതമല്ലാത്ത മേഖലയിലാണെന്നും ജില്ല ഭരണകൂടം അറിയിച്ചു.
അതേസമയം ചമോലി ജില്ലാ കളക്ടര് ഹിമന്ഷു ഖുരാന ദുരിതബാധിത പ്രദേശത്ത് സന്ദര്ശനം നടത്തി. ഭൂമിയെക്കുറിച്ച് നന്നായി മനസ്സിലാക്കുന്നതിന് അതിര്ത്തി ഉള്പ്പെടെയുള്ള കാര്യങ്ങള് കൃത്യമായി രേഖപ്പെടുത്തി വിശദമായ മാപ്പ് തയാറാക്കാന് അദ്ദേഹം റൂറല് വര്ക്ക് ഡിപ്പാര്ട്ട്മെന്റിന് (ആര്ഡബ്ല്യുഡി) നിര്ദേശം നല്കി.
ദുരിതബാധിതരില് നിന്ന് ആവശ്യമായ നിര്ദേശങ്ങള് സ്വീകരിച്ച് വിശദമായ പദ്ധതി സെന്ട്രല് ബില്ഡിങ് റിസേര്ച്ച് ഇന്സ്റ്റിറ്റിയൂട്ട്(സിബിആര്ഐ)നടപ്പാക്കുമെന്നും അദ്ദേഹം പറഞ്ഞു. അടിസ്ഥാന സൗകര്യങ്ങള് പരിശോധിച്ച് വരികയാണെന്നും ദുരിതബാധിതര്ക്ക് സാധ്യമായ എല്ലാ സഹായവും നല്കുന്നുണ്ടെന്നും ഖുരാന പറഞ്ഞു.
മലനിരകളിലെ എല്ലാ പട്ടണങ്ങളുടെയും വാഹകശേഷിയെക്കുറിച്ച് വിശദമായ പഠനം നടത്താന് മുഖ്യമന്ത്രി പുഷ്കര് സിങ് ധാമിയുടെ അധ്യക്ഷതയില് ചേര്ന്ന മന്ത്രിസഭായോഗത്തില് തീരുമാനമായി. നേരത്തെ, ദുരിതബാധിത പ്രദേശങ്ങളിലെ കുടുംബങ്ങളുടെ ആറ് മാസത്തെ വൈദ്യുതി ചാര്ജും, വെള്ളക്കരവും സര്ക്കാര് എഴുതിത്തള്ളിയിരുന്നു.
അതേസമയം വിള്ളലുണ്ടായ കെട്ടിടങ്ങള് പൊളിക്കാനുള്ള നടപടികള് ഇന്ന് വീണ്ടും തുടങ്ങിയേക്കും. കാലാവസ്ഥ പ്രതികൂലമായതോടെയാണ് പൊളിക്കല് നടപടി താല്ക്കാലികമായി നിര്ത്തിയത്. അടുത്ത ദിവസങ്ങളില് പ്രവര്ത്തനങ്ങള് പുനരാരംഭിക്കാന് കഴിയുമെന്നും അധികൃതര് അറിയിച്ചു. സിബിആര്ഐ സംഘത്തിന്റെ മേല്നോട്ടത്തിലാണ് കെട്ടിടങ്ങള് പൊളിക്കുന്നത്.
