ന്യൂദല്‍ഹി: ഗുജറാത്ത് കലാപത്തെക്കുറിച്ച് സത്യം വളച്ചൊടിച്ച് തയ്യാറാക്കിയ ഡോക്യുമെന്‍ററി സംപ്രേഷണം ചെയ്തതിന് ബിബിസിയെ വിമര്‍ശിച്ച് തുറന്ന കത്തെഴുതി 133 ബ്യൂറോക്രാറ്റുകളും 156 റിട്ട. സൈനികോദ്യോഗസ്ഥരും 13 റിട്ട. ജഡ്ജിമാരും.
പഴയ ബ്രിട്ടീഷ് സാമ്രാജ്യത്വം വീണ്ടും വരുമെന്ന മിഥ്യാബോധത്തില്‍ തയ്യാറാക്കിയതാണ് ഈ ഡോക്യുമെന്‍ററിയെന്ന് തുറന്ന കത്തില്‍ പറയുന്നു. “ഇക്കുറി ഇത് നടക്കില്ല. ഞങ്ങളുടെ നേതാവിനോട് ഇത് നടക്കില്ല. ഇന്ത്യയോട് ഈ കളി നടക്കില്ല. ഞങ്ങളുടെ മേല്‍നോട്ടമുള്ളപ്പോള്‍ ഇത് നടക്കില്ല.” – കത്ത് ബിബിസിയെ വിമര്‍ശിക്കുന്നു.
പണ്ടത്തെ ഹിന്ദു-മുസ്ലിം ലഹള ബ്രിട്ടീഷുകാരുടെ സംഭാവനയായിരുന്നു. വീണ്ടും അത് മടക്കിക്കൊണ്ടുവന്ന് ഭിന്നിപ്പിച്ച് ഭരിയ്‌ക്കുന്ന തന്ത്രം പയറ്റുകയാണ് ബിബിസി ചെയ്യുന്നത്. – തുറന്ന കത്ത് പറയുന്നു.
“75 വര്‍ഷത്തെ പാരമ്പര്യമുള്ള ഇന്ത്യയുടെ സ്വതന്ത്ര, ജനാധിപത്യ രാജ്യം എന്ന നിലനില്‍പിനെയാണ് ഈ ഡോക്യുമെന്‍ററി ചോദ്യം ചെയ്തത്. വസ്തുതകള്‍ പറയാതെ റിപ്പോര്‍ട്ട് ചെയ്യുന്നു, ആരോപിക്കപ്പെടുന്നു എന്നെല്ലാം പറഞ്ഞാണ് ഗുജറാത്ത് കലാപത്തെകക്കുറിച്ച് വിവരിക്കുന്നത്. ഇത് സത്യം വളച്ചൊടിക്കലാണ്. ഇതിന് ന്യായീകരണമില്ല. “- തുറന്ന കത്ത് പറയുന്നു.
ഇന്ത്യയുടെ ഉയര്‍ന്ന നീതിന്യായപീഠമായ സുപ്രീംകോടതി 2002ലെ ഗുജറാത്ത് കലാപത്തില്‍ മോദിക്ക് പങ്കില്ലെന്ന കാര്യം അര്‍ത്ഥശങ്കയ്‌ക്കിടയില്ലാത്ത വിധം വിധിച്ചതാണ്. അന്ന് മുഖ്യമന്ത്രിയായ നരേന്ദ്രമോദി നയിക്കുന്ന സര്‍ക്കാര്‍ കലാപം നടക്കുമ്പോല്‍ നിഷ്ക്രിയമായി ഇരിക്കുകയോ പക്ഷപാതപരമായി പങ്കാളികളാവുകയോ ചെയ്തിട്ടില്ല. – കത്ത് പറയുന്നു. സുപ്രീംകോടതിയെയാണ് ബിബിസ വെല്ലുവിളിച്ചതെന്നും കത്തില്‍ പറയുന്നു.
