ന്യൂദല്ഹി: ഇന്ത്യയുടെ ജെയിംസ് ബോണ്ടായി അറിയപ്പെടുന്ന ഭാരതത്തിന്റെ ദേശീയ സുരക്ഷാ ഉപദേഷ്ടാവ് അജിത് ഡോവലിന് 77ാം ജന്മദിനാശംസിച്ച് ഭാരതം. ജന്മദിനമായ ജനവരി 20 വെള്ളിയാഴ്ച സമൂഹമാധ്യമങ്ങളില് സന്ദേശങ്ങളുടെ ഇടതടവില്ലാത്ത ഒഴുക്കായിരുന്നു. ഇന്ത്യയുടെ ദേശീയ സുരക്ഷാ ഉപദേഷ്ടാവായ ഇദ്ദേഹം മോദി സര്ക്കാരിന്റെ രഹസ്യാന്വേഷണ-പ്രതിരോധരംഗത്തെ നട്ടെല്ലാണ്. ദേശീയ സുരക്ഷാ പ്രശ്നങ്ങളിലും അന്താരാഷ്ട്ര നയതന്ത്രങ്ങളിലും ഇന്ത്യയുടെ അന്തസ്സും അഭിമാനവും കാത്തുസൂക്ഷിക്കുന്ന ഒട്ടേറെ നിര്ണ്ണായക തീരുമാനങ്ങള് എടുത്ത വ്യക്തിയാണ് അജിത് ഡോവല്.
അജിത് ഡോവലിന്റെ ജീവചരിത്രം ഒറ്റനോട്ടത്തില്:
ഏഴ് വര്ഷം പാകിസ്താനില് ചാരനായി ജീവിച്ചു. ഐഎസ്ഐഎസിന്റെ കയ്യില് നിന്നും 46 നഴ്സുമാരെ രക്ഷിച്ചു. 15 ഹൈജാക്കിംഗ് ശ്രമങ്ങളെ നിര്വ്വീര്യമാക്കി. അതില് ഒന്നാണ് കാണ്ഡഹാറിലേക്ക് താലിബാന് ഇന്ത്യന് വിമാനം റാഞ്ചിയ സംഭവം. 1999ല് കാണ്ഡഹാറില് എയറിന്ത്യയുടെ ഐസി 814 വിമാനം ഹൈജാക്ക് ചെയ്തതില് കേന്ദ്രസര്ക്കാര് നിര്ദേശപ്രകാരം അജിത് ഡോവല് ഇടപെട്ടു. ഇതില് മസൂദ് അസ്ഹര് എന്ന ഭീകരനെ മോചിപ്പിക്കുക എന്നതായിരുന്നു തീവ്രവാദികളുടെ ആവശ്യം.
അന്ന് അജിത് ഡോവലാണ് ജയിലില് നിന്നും മസൂദ് അസ്ഹറിനെ കാണ്ഡഹാറില് എത്തിച്ച് ഇന്ത്യന് വിമാനത്തെ ഭീകരരില് നിന്നും മോചിപ്പിച്ചത്. നാഗാ ഭീകരരുമായി സമാധാനക്കരാര് ഉണ്ടാക്കി. പാകിസ്താനില് സര്ജിക്കല് സ്ട്രൈക്ക് നടത്തി. ഓപ്പറേഷന് ബ്ലാക്ക് തണ്ടറിന് നേതൃത്വം നല്കി. അങ്ങിനെ എത്രയോ രഹസ്യഓപ്പറേഷനുകള്ക്കും നയതന്ത്രപ്രവര്ത്തനങ്ങള്ക്കും നേതൃത്വം നല്കിയ വ്യക്തിയാണ് അജിത് ഡോവല്. ഏറ്റവുമൊടുവില് വളരെ വിദഗ്ധരമായി പോപ്പുലര് ഫ്രണ്ട് നിരോധനം പഴുതില്ലാതെ നടപ്പാക്കിയതിന് പിന്നിലും അജിത് ഡോവലിന്റെ ബുദ്ധിയാണെന്ന് പറയുന്നു.
രാജ്യസ്നേഹത്തിന്റെ സ്പിരിറ്റാണ് അജിത് ഡോവലിന്റെ കരുത്ത്. അദ്ദേഹത്തിന്റെ ബുദ്ധിപൂര്വ്വമായ പ്രവര്ത്തനങ്ങള് ഒട്ടേറെപ്പേരെ പ്രചോദിപ്പിച്ചു. 1968ല് ഐപിഎസായി. 1986ല് മിസോറാം സമാധാനക്കരാറുണ്ടാക്കി. 2004ല് ഇന്റലിജന്സ് ബ്യൂറോ ഡയറക്ടറായി. മോദി അധികാരത്തില് വന്ന 2014 മുതല് ഇന്ത്യയുടെ ദേശീയ സുരക്ഷാ ഉപദേഷ്ടാവാണ്.
