തൃശൂര് : തൃശൂര് മുരിയാട് ധ്യാനകേന്ദ്രത്തിന് മുന്നില് തമ്മിത്തല്ല്. വിശ്വാസികളും സഭാ ബന്ധം ഉപേക്ഷിച്ചവരും തമ്മിലുണ്ടായ വാക്കു തര്ക്കമാണ് സംഘര്ത്തിലേക്ക് നീങ്ങിയത്. എംപറര് ഇമ്മാനുവല് ധ്യാന കേന്ദ്രത്തിന് മുമ്പാകെയാണ് കൂട്ടത്തല്ല് അരങ്ങേറിയത്. ആക്രമണത്തില് ചിലര്ക്ക് പരിക്കേറ്റിട്ടുണ്ട്.
കാറില് സഞ്ചരിച്ച് മുരിയാട് സ്വദേശി ഷാജിയും കുടുംബത്തിനു നേരെ വിശ്വാസികള് സംഘം ചേര്ന്ന് ആക്രമണം അഴിച്ചുവിടുകയായിരുന്ന എന്നാണ് ആരോപണം. ഷാജിയും കുടുംബവും ഫാം ഹൗസില് നിന്ന് വീട്ടിലേക്ക് വരുന്ന വഴി ഒരു സംഘം സ്ത്രീകള് ആക്രമിക്കുകയായിരുന്നു. ആക്രമണത്തില് ഷാജി, മക്കളായ ഷാജന് ഷാരോണ്, സാജന്റെ ഭാര്യ ആഷ്ലീന്, ബന്ധുക്കളായ മാറാട്ടുകളത്തില് എഡ്വിന്, അന്വിന് എന്നിവര്ക്ക് പരിക്കേറ്റിട്ടുണ്ട്. സഭാ ബന്ധം ഉപേക്ഷിച്ചവരാണ് ഷാജിയുടെ കുടുംബം.
ധ്യാന കേന്ദ്രത്തിന് സമീപത്തുവെച്ച് അറുപത് സ്ത്രീകള് ചേര്ന്ന് പെപ്പര് സ്പ്രേയും മാരകായുധങ്ങളുമായി ആക്രമിക്കുകയായിരുന്നെന്നാണ് പരാതി. ഷാജിയുടെ മകനായ ഷാജന് എംപറര് ഇമ്മാനുവല് സഭാ മേലധ്യക്ഷരുടെ വ്യാജ ചിത്രങ്ങള് മോര്ഫ് ചെയ്തു പ്രചരിപ്പിച്ചു എന്ന് ആരോപിച്ചായിരുന്നു ആക്രമണം. ഇത്തരത്തിലുള്ള അശ്ലീല ദൃശ്യങ്ങള് പ്രചരിച്ചിരുന്നതായി പോലീസ് സ്ഥിരീകരിക്കുന്നുണ്ട്.
ഷാജിയും കുടുംബവും സ്വകാര്യ ആശുപത്രിയില് ചികിത്സയിലാണ്. ആക്രമിച്ചെന്നാരോപിച്ച് ഇരുകൂട്ടരും പോലീസില് പരാതി നല്കിയിട്ടുണ്ട്.
