കോട്ടയം : ഈരാറ്റുപേട്ട തേവരുപാറയില് നിന്നും കോടൈക്കനിലേക്ക് വിനോദയാത്രക്ക് പോയി കാണാതായ രണ്ടുപേരെ കണ്ടെത്തി. പൂണ്ടി വനത്തിലെ ആനകളുള്പ്പെടെ വന്യജീവികള് ഉള്ള 25 കിലോമീറ്റര് അകലയുള്ള കത്രികവ എന്ന ഉള്വനത്തില് നിന്നും വിറക് വെട്ടാന് പോയ രണ്ട് തൊഴിലാളികളാണ് പുലര്ച്ചെ നാല് മണിയോടെ കണ്ടെത്തിയത്. അവര് അധികൃതരെ അറിയിച്ചു.
ഈരാറ്റുപേട്ട തേവരുപാറയില് പള്ളിപ്പാറയില് അല്ത്താഫ് (24), മുല്ലൂപ്പാറ ബഷീറിന്റെ മകന് ഹാഫിസ് (23) എന്നിവരെയാണ് കോടൈക്കനിലെ പൂണ്ടി വനത്തില് കാണാതായത്. ദിവസങ്ങള് നീണ്ട തിരച്ചിലിനൊടുവിലാണ് ഇവരെ കണ്ടെത്തിയിരിക്കുന്നത്. രണ്ടുപേരും പുതുവര്ഷത്തോടനുബന്ധിച്ച് സുഹൃത്തുക്കള്ക്കൊപ്പം വിനോദ യാത്രയ്ക്ക് പോയതായിരുന്നു. അഞ്ചംഗസംഘം കൊടൈക്കനാലിലെ പൂണ്ടിയില് ഹോം സ്റ്റേയില് രണ്ടു മുറികളെടുത്തിരുന്നു. ഇതില് ഒരേ മുറിയിലായിരുന്നു അല്ത്താഫും ഹാഫിസും. പൂണ്ടി വനത്തിനുള്ളിലേക്ക് ട്രക്കിങ്ങിന് പോകുന്നതിനിടെ ഇവരെ കാണാതായെന്നാണ് കൂടെയുണ്ടായിരുന്നവര് പറഞ്ഞത്.
തുടര്ന്ന് രണ്ടുദിവസമായി ഇവര്ക്ക് വേണ്ടി തിരച്ചില് തുടര്ന്നുവരികയായിരുന്നു. കുടുംബത്തിന്റെ പരാതിയില് കൊടൈക്കനാല് പോലീസാണ് ആദ്യം തിരച്ചില് നടത്തിയത്. പിന്നീട് ഈരാറ്റുപേട്ട പോലീസും അന്വേഷണത്തില് ഒപ്പം ചേരുകയായിരുന്നു. ഈരാറ്റുപേട്ടയില് നിന്നുള്ള സാമൂഹികസംഘടനയായ നന്മക്കൂട്ടം എന്ന സംഘവും പോലീസിനൊപ്പം തെരച്ചില് നടത്തിയിരുന്നു.
