കോഴിക്കോട് : വടകര മാര്ക്കറ്റ് റോഡില് വ്യാപാരിയെ കടയ്ക്കുള്ളില് മരിച്ച നിലയില് കണ്ടെത്തി. അടക്കാത്തെരു പുതിയാപ്പ സ്വദേശി പലവ്യഞ്ജന കട നടത്തുന്ന രാജന് (62)നാണ് മരിച്ചത്. മോഷണത്തിനിടെയുള്ള കൊലപാതകമാണെന്നാണ് പ്രാഥമിക നിഗമനം. ശനിയാഴ്ച രാത്രി 12 മണിയോടെയാണ് സംഭവമുണ്ടായത്.
കട അടച് വീട്ടില് എത്തേണ്ട പതിവ് സമയം കഴിഞ്ഞിട്ടും രാജന് രാത്രിയില് വീട്ടിലെത്താതിരുന്നതോടെ വീട്ടുകാര് കടയില് അന്വേഷിച്ച് എത്തിയപ്പോഴാണ് നിലത്ത് മരിച്ചു കിടക്കുന്ന നിലയില് കണ്ടെത്തിയത്. ഇയാളുടെ ശരീരത്തിലുണ്ടായിരുന്ന മൂന്ന് പവന് സ്വര്ണ ചെയിനും, മോതിരവും, കടയിലുണ്ടായിരുന്ന പണവും നഷ്ടപ്പെട്ടതായി പോലീസ് പറഞ്ഞു.
രാജന്റെ കഴുത്തിലും, മുഖത്തും, വിരലുകളിലും പരിക്കേറ്റ പാടുകളുണ്ട്. ഇയാളുടെ മോട്ടോര് ബൈക്കും കാണാതായി. മൃതദേഹം വടകര ഗവ ആശുപത്രി മോര്ച്ചറിയിലേക്ക് മാറ്റി. സ്ഥലത്ത് പോലീസെത്തി പരിശോധന നടത്തി. സംഭവത്തില് കേസ് രജിസ്റ്റര് ചെയ്ത് അന്വേഷണം ആരംഭിച്ചിട്ടുണ്ട്.
