ന്യൂദല്ഹി: ലോകത്തിലെ മൂന്നാമത്തെ വലിയ സമ്പദ്ഘടനയായി 2027ല് ഇന്ത്യ മാറുമെന്ന് സാമ്പത്തിക വിദഗ്ധന്. മോര്ഗന് സ്റ്റാന്ലിയിലെ മുഖ്യ ഏഷ്യ സാമ്പത്തികവിദഗ്ധന് ചേതന് അഹ്യയുടേതാണ് ഈ പ്രവചനം.
ഫിനാന്ഷ്യന് ടൈംസില് എഴുതിയ ലേഖനത്തില് അടുത്ത 10 വര്ഷത്തില് ഇന്ത്യയുടെ സമ്പദ്ഘടന ഇപ്പോഴത്തെ 3.4 ട്രില്ല്യണ് ഡോളറില് നിന്നും 8.5 ട്രില്ല്യണ് ഡോളറായി ഉയരുമെന്നും അദ്ദേഹം പ്രവചിക്കുന്നു. വര്ഷം തോറും ഇന്ത്യയുടെ മൊത്ത ആഭ്യന്തര ഉല്പാദനത്തില് 400 ബില്യണ് ഡോളറിന്റെ വര്ധനയുണ്ടാകുമെന്നും ചേതന് അഹ്യ പറയുന്നു.
മോദി സര്ക്കാരിന്റെ ആഭ്യന്തരനയത്തില് നിക്ഷേപത്തിനും തൊഴില് സൃഷ്ടിക്കും പ്രാമുഖ്യം നല്കുന്നതിനാലാണ് ഇതെന്നും ഇദ്ദേഹം പറയുന്നു. മോദി സര്ക്കാര് നടപ്പാക്കിയ ജിഎസ്ടി, കോര്പറേറ്റ് നികുതി ഇളവുകള്, ഉല്പാദനവുമായി ബന്ധിപ്പിച്ചുള്ള സൗജന്യങ്ങള് എന്നിവ പുതിയ മാറ്റങ്ങള്ക്ക് വഴിവെയ്ക്കുന്നുവെന്നും ചേതന് അഹ്യ സൂചിപ്പിക്കുന്നു. ഉല്പാദനരംഗത്തെ കയറ്റുമതിയില് കുതിപ്പുണ്ടാക്കാന് മോദി സര്ക്കാര് വന്തോതില് നിക്ഷേപം ആകര്ഷിച്ചുകൊണ്ടിരിക്കുകയാണ്. ഇത് കൂടുതല് തൊഴിലവസരങ്ങള് സൃഷ്ടിക്കാനും സുസ്ഥിര വളര്ച്ചാശൃംഖല സൃഷ്ടിക്കാനും സഹായിക്കും. അതുപോലെ യുവാക്കളുടെ എണ്ണത്തിലുള്ള വര്ധന ചൈനയെ പിന്തള്ളുന്നതിന് ഇന്ത്യയെ സഹായിക്കും. ഡിജിറ്റല് വല്ക്കരണരംഗത്തെ കുതിപ്പ് ഇന്ത്യയെ അടുത്ത ദശകത്തില് ആഗോള വളര്ച്ചയുടെ അഞ്ചിലൊന്ന് ഇന്ത്യയില് നിന്നാകുന്നതിന് സഹായിക്കും. – ഇങ്ങിനെപോകുന്ന ചേതന് അഹ്യയുടെ നിരീക്ഷണങ്ങള്.
ഐഎംഎഫും ഇതുതന്നെ പറഞ്ഞു
നേരത്തെ ഐഎംഎഫും ഇന്ത്യ ലോകത്തിലെ ഏറ്റവും വേഗത്തില് വളരുന്ന സമ്പദ്ഘടനയാകുമെന്ന് പ്രവചിച്ചിരുന്നു. 2022-2023 സാമ്പത്തിക വര്ഷത്തില് ഇന്ത്യയുടെ ജിഡിപി 6.8 ശതമാനം വളര്ച്ച നേടുമെന്നും ഐഎംഎഫ് പ്രവചിച്ചിരുന്നു. 2023ല് ജിഡിപി വളര്ച്ച 13.5 ശതമാനമായി വളരുമെന്നാണ് പ്രവചിക്കപ്പെടുന്നത്. കാര്ഷിക, സേവന മേഖലകളിലെ വളര്ച്ചയാണ് ഇതിന് സഹായകരമാവുക. ഉക്രൈന്-റഷ്യ യുദ്ധവും ഉയരുന്ന പണപ്പെരുപ്പവും മൂലമുള്ള ഭൗമരാഷ്ട്രീയ പ്രതിസന്ധികള്ക്കിടയിലായിരിക്കും ഇന്ത്യ ഈ നേട്ടം കൈവരിക്കുക എന്നതും ശ്രദ്ധേയമാണെന്ന് ഐഎംഎഫ് പറഞ്ഞു.
സ്വാതന്ത്ര്യത്തിന്റെ 100ാം വാര്ഷികം ആഘോഷിക്കുന്ന 2047ല് ഇന്ത്യ 30 ട്രില്യണ് ഡോളറിന്റെ സമ്പദ്ഘടനയായി മാറുമെന്ന് കേന്ദ്ര വാണിജ്യ മന്ത്രി പീയൂഷ് ഗോയല് റിപ്പബ്ലിക് ചാനല് സംഘടിപ്പിച്ച ഇന്ത്യ സാമ്പത്തിക ഉച്ചകോടിയില് പ്രവചിച്ചിരുന്നു. നവമ്പര് 30ന് നാഷണല് സ്റ്റാറ്റിസ്റ്റിക്സ് ഓഫീസ് പുതിയ ജിഡിപി വിവരം പ്രഖ്യാപിക്കാനിരിക്കുകയാണ്.
