ന്യൂദല്ഹി: റവന്യൂകമ്മി നികത്തുന്നതിനുള്ള സഹായധനത്തിന്റെ എട്ടാം ഗഡുവായി 14 സംസ്ഥാനങ്ങള്ക്ക് 7,183.42 കോടി രൂപ കേന്ദ്ര ധനമന്ത്രാലയത്തിനു കീഴിലുള്ള ധനവിനിയോഗ വകുപ്പ് അനുവദിച്ചു. പതിനഞ്ചാം ധനകാര്യ കമ്മിഷന്റെ ശുപാര്ശ പ്രകാരമാണ് സഹായധനം അനുവദിച്ചിരിക്കുന്നത്.കേരളത്തിന് 1097.83 കോടി രൂപ ലഭിക്കും.
2022-23 സാമ്പത്തിക വര്ഷത്തില് 14 സംസ്ഥാനങ്ങള്ക്ക് 86,201 കോടി രൂപയാണ് പതിനഞ്ചാം ധനകാര്യ കമ്മീഷന് ശുപാര്ശ ചെയ്തിരിക്കുന്നത്. ശുപാര്ശ ചെയ്ത സഹായധനം 12 തുല്യ പ്രതിമാസ ഗഡുക്കളായി ധന വിനിയോഗ വകുപ്പ് സംസ്ഥാനങ്ങള്ക്ക് അനുവദിക്കും. 2022 നവംബര് മാസത്തെ എട്ടാം ഗഡു അനുവദിച്ചതോടെ, 2022-23ല് സംസ്ഥാനങ്ങള്ക്ക് അനുവദിച്ച ആകെ റവന്യൂകമ്മി സഹായധനം 57,467.33 കോടി രൂപയായി ഉയര്ന്നു.
ഭരണഘടനയുടെ 275ാം അനുച്ഛേദ പ്രകാരമാണ് സംസ്ഥാനങ്ങള്ക്ക് റവന്യൂകമ്മി സഹായധനം നല്കുന്നത്. സംസ്ഥാനങ്ങളുടെ റവന്യൂ അക്കൗണ്ടുകളിലെ കമ്മി നികത്താന് തുടര്ച്ചയായി ധനകാര്യ കമ്മീഷനുകളുടെ ശുപാര്ശകള് പ്രകാരം സംസ്ഥാനങ്ങള്ക്ക് സഹായധനം അനുവദിക്കുന്നു.
2022-23 കാലയളവില് പതിനഞ്ചാം ധനകാര്യ കമ്മീഷന് റവന്യൂകമ്മി സഹായധനം ശുപാര്ശ ചെയ്ത സംസ്ഥാനങ്ങള് ഇവയാണ്: ആന്ധ്രാപ്രദേശ്, അസം, ഹിമാചല് പ്രദേശ്, കേരളം, മണിപ്പൂര്, മേഘാലയ, മിസോറാം, നാഗാലാന്ഡ്, പഞ്ചാബ്, രാജസ്ഥാന്, സിക്കിം, ത്രിപുര, ഉത്തരാഖണ്ഡ്, പശ്ചിമ ബംഗാള്
