തിരുവനന്തപുരം: സംസ്ഥാനത്തെ പൊതുമേഖലാ സ്ഥാപനങ്ങളില് പെന്ഷന് പ്രായം 60 ആക്കി ഉയര്ത്തിയ ഉത്തരവ് സര്ക്കാര് മരവിപ്പിച്ചു. ഇന്ന് ചേര്ന്ന മന്ത്രിസഭാ യോഗത്തിലാണ് തീരുമാനം. ഇതുമായി ബന്ധപ്പെട്ട തുടര്നടപടികള് വേണ്ടെന്നാണ് തീരുമാനം. ഇടത് യുവജനസംഘടനകള് ഉള്പ്പെടെയുള്ളവര് പ്രതിഷേധം ഉയര്ത്തിയതിന് പിന്നാലെയാണ് സര്ക്കാരിന്റെ മനംമാറ്റം. മരവിപ്പിക്കുന്നത് സംബന്ധിച്ച് തുടർനടപടികൾക്കായി ധനമന്ത്രിയെയും ചീഫ് സെക്രട്ടറിയെയും ചുമതലപ്പെടുത്തിയെന്നും സൂചനയുണ്ട്.
പെൻഷൻ പ്രായം ഉയർത്തിയ നടപടിയിൽ വലിയ പ്രതിഷേധമുണ്ടെന്ന് മുഖ്യമന്ത്രി തന്നെ മന്ത്രിസഭായോഗത്തിൽ വ്യക്തമാക്കിയതായാണ് വിവരം. റിയാബ് ചെയര്മാന് തലവനായ വിദഗ്ധ സമിതിയുടെ ശുപാര്ശ അംഗീകരിച്ചാണ് പൊതുമേഖലാ സ്ഥാപനങ്ങളുടെ പെന്ഷന് പ്രായം 60 ആക്കി ഏകീകരിച്ചത്. കെഎസ്ആര്ടിസി, കെഎസ്ഇബി, വാട്ടർ അതോറിറ്റി എന്നിവ ഒഴികെ 122 സ്ഥാപനങ്ങളിലും ആറ് ധനകാര്യ കോർപ്പറേഷനുകളിലുമാണ് പെൻഷൻ പ്രായം ഏകീകരിച്ചത് അറുപത് വയസാക്കിയത്.
29ന് ഇറക്കിയ ഉത്തരവ് പ്രകാരം ഒന്നരലക്ഷം പേര്ക്കാണ് ആനുകൂല്യം ലഭിക്കേണ്ടിയിരുന്നത്. ഈ മാസം വിരമിക്കേണ്ടവര്ക്ക് കൂടുതല് സര്വീസ് ലഭിക്കുമെന്നും കരുതിയിരുന്നു. നിലവില് വിരമിച്ചവര്ക്ക് ഈ ഉത്തരവ് ബാധകമായിരിക്കില്ലെന്നും അറിയിച്ചിരുന്നു. കൂടാതെ പെന്ഷന് പ്രായം കൂട്ടുന്നത് പ്രത്യേകമായി പഠിക്കാനും സര്ക്കാര് തീരുമാനിച്ചു. വിവിധ സര്വ്വീസ് സംഘടനകള് മുഴുവന് സര്ക്കാര് ജീവനക്കാരുടേയും പെന്ഷന് പ്രായം കൂട്ടണമെന്ന ആവശ്യം ഉയര്ത്തിയതിന് പിന്നാലെയായിരുന്നു ഈ ഉത്തരവ്.
പെന്ഷന് പ്രായം അറുപത് വയസാക്കി ഏകീകരിച്ച ഉത്തരവിനെതിരെ സിപിഐ യുവജന സംഘടന എഐവൈഎഫ് കടുത്ത വിമര്ശനമാണ് ഉയര്ത്തിയിരുന്നത്. അഭ്യസ്ഥവിദ്യരായ നിരവധി ചെറുപ്പക്കാരെ പ്രതിരോധത്തിലാക്കുന്ന നടപടിയാണ് ഇതെന്ന് എഐവൈഎഫ് സംസ്ഥാന കമ്മിറ്റി പ്രസ്താവനയില് പറഞ്ഞു. യൂത്ത് ലീഗ് അടക്കമുള്ള പ്രതിപക്ഷ യുവജന സംഘടനകളും തീരുമാനത്തില് പ്രതിഷേധമറിയിച്ചിരുന്നു.
