കൊച്ചി : ഇലന്തൂര് നരബലി കേസിലെ മുഖ്യപ്രതി ഷാഫി മറ്റൊരു കൊലപാതകം കൂടി നടത്തിയിരുന്നതായി വെളിപ്പെടുത്തല്. കേസിലെ മൊറ്റൊരു പ്രതിയായ ലൈലയാണ് ഇതുസംബന്ധിച്ച് അന്വേഷണ സംഘത്തോട് വെളിപ്പെടുത്തിയത്. ഇലന്തൂരില് വെച്ചാണ് ഇതുസംബന്ധിച്ച് ഷാജി പറഞ്ഞതെന്നും ലൈല അന്വേഷണ സംഘത്തോട് പറഞ്ഞു.
ഒരു വര്ഷം മുമ്പ് ഇലന്തൂരിലെ വിടിന്റഎ തിണ്ണയിലിരുന്ന് സംസാരിക്കുമ്പോഴാണ് ഷാഫി കൊലപാതകം സംബന്ധിച്ച് വെളിപ്പെടുത്തലുകള് നടത്തിയത്. എറണാകുളത്ത് വെച്ചാണ് കൊലപാതകം നടത്തിയത്. അതിനുശേഷം മനുഷ്യമാംസം വില്പ്പന നടത്തിയിരുന്നതായും ഷാഫി അറിയിച്ചിരുന്നു. നരബലി നടത്തുന്നതിനെ കുറിച്ച് തങ്ങള് ആലോചിച്ചു തുടങ്ങുന്ന സമയത്താണ് ഷാഫി ഇക്കാര്യം അറിയിച്ചതെന്നും ലൈല വെളിപ്പെടുത്തി.
അതേസമയം നരബലി നടത്തുന്നതിനായി ഭഗവല്സിങ്ങിനേും ലൈലയേയും വിശ്വസിപ്പിക്കുന്നതിനും അതിനായി പ്രേരിപ്പിക്കുന്നതിനും വേണ്ടിയാണ് മുമ്പ് കൊലനടത്തിയതെന്ന് പറഞ്ഞതെന്നാണ് ഷാഫി പോലീസിനോട് പ്രതികരിച്ചത്. ഷാഫി മുഖ്യകുറ്റവാളിയാണെന്ന് കൊച്ചി സിറ്റി പോലീസ് കമ്മിഷണര് സി.എച്ച്. നാഗരാജു അറിയിച്ചു. അറവുകാരനെപ്പോലെയാണ് ഷാഫിയുടെ പെരുമാറ്റം. നരബലി നടത്തിയ പത്മയുടേയും റോസ്ലിന്റേയും ശരീര ഭാഗങ്ങള് ഷാഫി ആയിരിക്കും മുറിച്ചുമാറ്റിയത്. കേസുമായി ബന്ധപ്പെട്ട് ഷാഫിയുമായി നിരവധി സ്ഥലങ്ങളില് ഇനിയും തെളിവെടുപ്പ് നടത്തേണ്ടതുണ്ട്.
എന്നാല് നരബലിക്ക് അവയവ കൈമാറ്റത്തിനുള്ള സാധ്യത കമ്മിഷണര് പൂര്ണ്ണമായും തള്ളി. ട്രാന്പ്ലാന്റേഷന് വൃത്തിയുള്ള അന്തരീക്ഷത്തിലാണ് ചെയ്യേണ്ടത്. മനുഷ്യ മാംസം വിറ്റ് പണം സമ്പാദിക്കാന് സാധിക്കുമെന്ന് ലൈലയേയും ഭഗവല് സിങ്ങിനേയും ഷാഫി വിശ്വസിപ്പിച്ചിട്ടുണ്ട്. ഇതിലൂടെ 20 ലക്ഷം രൂപവരെ കിട്ടുമെന്നാണ് ഇയാള് അവരെ അറിയിച്ചിരുന്നത്. പ്രതികള് അന്വേഷണ സംഘത്തോട് സഹകരിക്കുന്നുണ്ട്. എന്നാല് എല്ലാവരേയും വിശ്വാസത്തില് എടുക്കാന് കഴിയില്ലെന്നും കമ്മിഷണര് കൂട്ടിച്ചേര്ത്തു.
