ബെംഗളൂരു: എടിഎം മാതൃകയില്‍ ജനങ്ങള്‍ക്ക് 24 മണിക്കൂറും ഇഡ്ഡലിയും ചട്നിയും ലഭ്യമാകുന്ന ഇഡ്ഡലി വെന്‍ഡിങ് മെഷീന്‍ ജനങ്ങള്‍ക്ക് മുമ്പില്‍ അവതരിപ്പിച്ച് ബെംഗളൂരുവിലെ റെസ്റ്റോറന്റ്. ബെംഗളൂരുവില്‍ പ്രവര്‍ത്തിക്കുന്ന റെസ്റ്റൊറന്റാണ് ഈ ഇഡ്ഡലി വെന്‍ഡിങ് മെഷീന്‍ അവതരിപ്പിച്ചിരിക്കുന്നത്.
ഫ്രെഷോട്ട് എന്നാണ് എടിഎം കടയുടെ പേര്. ഇഡ്ഡലി, വട, പൊടി ഇഡ്ഡലി എന്നിവയെല്ലാം മെനുവില്‍ ഉള്‍പ്പെട്ടവയാണ്. വെന്‍ഡിങ് മെഷീനിലെ ആപ്ലിക്കേഷന്‍ കോഡ് സ്‌കാന്‍ ചെയ്താല്‍ ഓണ്‍ലൈനായി പേയ്‌മെന്റ് നടത്താനും ഫുഡ് ഓഡര്‍ കൊടുക്കാനും കഴിയും.
ഏതാനും മിനിറ്റുകള്‍ക്കുള്ളില്‍ കണ്ടെയ്നറിലാക്കിയ ചൂടേറിയ ഇഡ്ഡലിയും ചട്നിയും ആവശ്യക്കാരുടെ മുമ്പിലേക്ക് എത്തും. 50 സെക്കന്‍ഡ് കൊണ്ടാണ് ഇഡ്ഡലി ഈ മെഷീനില്‍ നിന്ന് ഉണ്ടാവുന്നത്. പിന്നാലെ ഇതൊരു ചെറിയ പാക്കറ്റില്‍ പാക്ക് ചെയ്ത് ഓര്‍ഡര്‍ ചെയ്തയാളുടെ കൈയ്യിലേക്ക് എത്തുകയാണ് ചെയ്യുന്നത്. ഇഡ്ഡലി വെന്‍ഡിങ് മെഷീന്‍ പ്രവര്‍ത്തിക്കുന്നതിന്റെ വീഡിയോ ട്വിറ്ററില്‍ ഇതിനകം വൈറല്‍ ആയിട്ടുണ്ട്. ഇതിനോടകം തന്നെ ഒട്ടേറെപ്പേരാണ് വീഡിയോ റീട്വീറ്റ് ചെയ്തിരിക്കുന്നത്.
ഭക്ഷണം വിളമ്പുന്നതിന് റോബോട്ടിക് സാങ്കേതികവിദ്യ അവതരിപ്പിച്ചതും വലിയ റെസ്റ്റൊറന്റുകളില്‍ ട്രെയ്ന്‍ ലൈനിന്റെ മാതൃകയില്‍ തീന്‍മേശയിലേക്ക് ഭക്ഷണമെത്തിച്ച് നല്‍കുന്നതിന്റെയുമെല്ലാം തുടര്‍ച്ചയാണിത്.
