തിരുവനന്തപുരം: പത്തു ദിവസത്തെ ഒമാന്-യുഎസ് ഔദ്യോഗിക സന്ദര്ശനം പൂര്ത്തിയാക്കി കേന്ദ്ര വിദേശകാര്യ സഹമന്ത്രി വി. മുരളീധരന് തലസ്ഥാനത്തെത്തി. ഔദ്യോഗിക യാത്രയുടെ ഭാഗമായി നിറവേറ്റിയ ഉത്തരവാദിത്തങ്ങളുടെ വിവരങ്ങളും അദേഹം ഫേസ്ബുക്ക് പോസ്റ്റിലൂടെ പങ്കുവച്ചു. കേരളത്തിലെ മന്ത്രിമാരുടെ വിദേശയാത്രകള് സംബന്ധിച്ച് ആക്ഷേപങ്ങള് ഉയരുന്ന സാഹചര്യത്തിലാണ് കേന്ദ്രമന്ത്രി ഈ മാതൃക. വി. മുരളീധരന് പോസ്റ്റിനുതാഴെ അഭിനന്ദനവും പിന്തുണയുമറിയിച്ച് നിരവധിപേരാണ് കമ്മന്റുകള് രേഖപ്പെടുത്തിയത്.
കേന്ദ്ര വിദേശകാര്യ സഹമന്ത്രിയുടെ പത്തു ദിവസത്തെ ഒമാന്-യുഎസ് ഔദ്യോഗിക സന്ദര്ശനത്തിന്റെ ഭാഗമായി ഒമാന് വിദേശകാര്യമന്ത്രിയുമായി ഇന്ത്യ-ഒമാന് വാണിജ്യ, വ്യാപാര ബന്ധമടക്കം വിവിധതലങ്ങളില് ഉഭയകക്ഷി ബന്ധം ശക്തിപ്പെടുത്തുന്നതിനുള്ള ചര്ച്ചകള് നടന്നു. വാര്ത്താ, വിവര കൈമാറ്റത്തിന് ഇന്ത്യ-ഒമാന് സഹകരണ കരാറിലും, റുപെ ഡെബിറ്റ് കാര്ഡ് പുറത്തിറക്കുന്നതിന് സെന്ട്രല് ബാങ്ക് ഓഫ് ഒമാനും എന്പിസിഐയും തമ്മിലുളള ധാരണപത്രത്തിലും ഒപ്പുവച്ചു. ഇന്ത്യന് തൊഴിലാളികളുമായുള്ള കൂടിക്കാഴ്ച, വിമാന ടിക്കറ്റ് നിരക്ക് അടക്കം അവരുടെ പ്രധാന പരാതികള് കേട്ടത്തിനു പിന്നാലെ ഇന്ത്യന് എംബസിയുടെ ലൈബ്രറിയുടെ ഉദ്ഘാടനവും നിര്വഹിച്ചു. രണ്ടു ദിവസത്തെ ഒമാന് സന്ദര്ശനത്തിനിടെ 20 പരിപാടികളിലാണ് അദേഹം പങ്കെടുത്തതെന്നും വ്യക്തമാക്കി.
തുടര്ന്ന് യുഎസ് യാത്രയില് ന്യൂയോര്ക്കില് യു.എന് രക്ഷാസമിതിയില് ‘ആഫ്രിക്കയിലെ സമാധാനവും സുരക്ഷയും, ഭീകരവാദികളുടെ സാമ്പത്തിക സ്രോതസ് തടയല് ‘ എന്ന വിഷയത്തില് നടന്ന ചര്ച്ചയില് പങ്കെടുത്ത് ഇന്ത്യയുടെ നിലപാട് വ്യക്തമാക്കി. ഐക്യരാഷ്ട്രസഭയുടെ പൊതുസഭാ പ്രസിഡന്റ് ചാബാ കൊറോസിയുമായി കൂടിക്കാഴ്ച നടത്തി. അന്താരാഷ്ട്ര സമവായങ്ങളില് ഇന്ത്യന് നിലപാട് അറിയിച്ചു. ഇന്ത്യ-യുഎന്ഡിപി അഞ്ചാം വാര്ഷികാഘോഷത്തില് മുഖ്യപ്രഭാഷണം നടത്തി കോവിഡാനന്തര ലോകത്തെക്കുറിച്ചുള്ള ഇന്ത്യന് കാഴ്ചപ്പാടുകളും അദേഹം വ്യക്തമാക്കി. അറ്റ്ലാന്റയില് ഇന്ത്യന് സമൂഹവുമായി കൂടിക്കാഴ്ച നടത്തി. അടുത്ത വര്ഷം നടക്കുന്ന പ്രവാസി ഭാരതീയ ദിവസ് വിജയകരമാക്കാന് പിന്തുണ അഭ്യര്ഥിച്ചതായി അദേഹത്തിന്റെ പോസ്റ്റില് പറഞ്ഞു.
