ഏറ്റുമാനൂര്‍ : ഇളയ മകളുടെ വിവാഹത്തിനായി അമ്മ സൂക്ഷിച്ചുവെച്ച സ്വര്‍ണം കവര്‍ന്നകേസില്‍ മൂത്തമകളും മരുമകനും അറസ്റ്റില്‍. തിരുവനന്തപുരം കരമന കുന്നിന്‍പുറംഭാഗത്ത് കിരണ്‍രാജ്(26) ഭാര്യ ഐശ്വര്യ(22)എ്ന്നിവരാണ് അറസ്റ്റിലായത്. ഇവരുടെ അമ്മ നല്‍കിയ പരാതിയില്‍ ഏറ്റുമാനൂര്‍ പോലീസാണ് അറസ്റ്റ് ചെയ്തത്.
ഓണാവധിക്ക് കുടുംബവീടായ ഏറ്റുമാനൂര്‍ പേരൂരിലേക്ക് എത്തിയ ഐശ്വര്യ അവിടെ അമ്മ സൂക്ഷിച്ചിരുന്ന സ്വര്‍ണം കവര്‍ന്ന് സ്വന്തം വീട്ടിലേക്ക് കൊണ്ടുപോവുകയായിരുന്നു. ഇവരുടെ അമ്മ അപ്പോള്‍ പാലക്കാട് ജോലിക്ക് പോയിരക്കുകയായിരുന്നു. അവര്‍ തിരിച്ചെത്തിയപ്പോഴാണ് സൂക്ഷിച്ചു വെച്ചിരുന്ന 10 പവന്‍ സ്വര്‍ണം കാണാനില്ലെന്ന് അറിയുന്നത്. തുടര്‍ന്ന് ഏറ്റുമാനൂര്‍ പോലീസില്‍ പരാതി നല്‍കി.
പോലീസ് വീട്ടില്‍ ഉണ്ടായിരുന്നവരെ ചോദ്യം ചെയ്യാനെത്തിയപ്പോള്‍ സ്വര്‍ണം ഇവരുടെ അച്ഛന്‍ എടുത്തതാണെന്ന് പറഞ്ഞ് തെറ്റിദ്ധരിപ്പിക്കാന്‍ ഐശ്വര്യ ശ്രമം നടത്തി. സംശയം തോന്നി പോലീസ് നടത്തിയ ചോദ്യം ചെയ്യലിലാണ് കവര്‍ച്ച പുറത്തുവരുന്നത്.
ജില്ലാ പോലീസ് മേധാവി കെ. കാര്‍ത്തിക്കിന്റെ നേതൃത്വത്തിലുള്ള അന്വേഷണസംഘം ശാസ്ത്രീയപരിശോധനകള്‍ക്കൊടുവില്‍, സ്വര്‍ണം മോഷ്ടിച്ചത് മകള്‍ തന്നെയാണെന്ന് കണ്ടെത്തി. ഐശ്വര്യയുടെ ഭര്‍ത്തൃവീട്ടില്‍നിന്ന് 10 പവന്‍ സ്വര്‍ണം കണ്ടെടുത്തു. ഇതില്‍ അഞ്ച് പവന്‍ മുക്കുപണ്ടമായിരുന്നു.
മോഷ്ടിച്ച സ്വര്‍ണത്തില്‍നിന്ന് അഞ്ചുപവന്‍ വരുന്ന മാല പണയംവെച്ചു. ഇതിന് പകരമായി അത്രയും മുക്കുപണ്ടവും പെട്ടിയില്‍ വെക്കുകയായിരുന്നെന്നും ഇവര്‍ പോലീസിനോട് പറഞ്ഞു. പ്രതികളെ കോടതിയില്‍ ഹാജരാക്കി.
