തിരുവനന്തപുരം: മോട്ടോര് വാഹന വകുപ്പ് ആരംഭിച്ച ഫോക്കസ് 3 പരിശോധനയില് ഇന്ന് വിനോദസഞ്ചാര വാഹനങ്ങളിലെ നിയമലംഘനങ്ങള് കണ്ടെത്തി നടപടിയെടുത്തത് 1279 കേസുകളില്. വടക്കഞ്ചേരി ബസ് അപകടത്തിന് പിന്നാലെയാണ് മോട്ടോര് വാഹനവകുപ്പ് വിനോദസഞ്ചാരത്തിന് പോകുന്ന വാഹനങ്ങളില് പരിശോധന ആരംഭിച്ചത്.
രൂപമാറ്റം വരുത്തിയതിന് 68 കേസുകള് രജിസ്റ്റര് ചെയ്തു. സ്പീഡ് ഗവര്ണര് ഇല്ലാത്ത 85 വാഹനങ്ങള് പിടികൂടി. നിയമവിധേയമല്ലാത്ത ലൈറ്റുകള് ഉപയോഗിച്ച 645 ഉം എയര്ഹോണുകള് ഉപയോഗിച്ച 201 ഉം വാഹനങ്ങളും മോട്ടോര് വാഹന വകുപ്പ് ഉദ്യോഗസ്ഥര് കണ്ടെത്തി. 26.15 ലക്ഷം രൂപ പിഴ ചുമത്തി. 2.65 ലക്ഷം രൂപ പിഴ തുക ഈടാക്കിയിട്ടുണ്ട്. എട്ടു വാഹനങ്ങള്ക്ക് ഫിറ്റ്നസ് സര്ട്ടിഫിക്കറ്റ് റദ്ദാക്കാന് നോട്ടീസ് നല്കി. രണ്ട് വാഹനങ്ങളുടെ രജിസ്ട്രേഷനും ഒമ്പത് ഡ്രൈവര്മാരുടെ ലൈസന്സും റദ്ദാക്കാന് നടപടി സ്വീകരിച്ചു.
