ശ്രീനഗര്: പഠാനില് കഴിഞ്ഞ ദിവസം സൈന്യം വെടിവച്ചുകൊന്ന ഭീകരര് ബാരാമുള്ളയിലെ അഗ്നിവീര് റിക്രൂട്ട്മെന്റ് റാലി ആക്രമിക്കാന് പദ്ധതിയിട്ടിരുന്നുവെന്ന് പോലീസ്. 10 സെക്ടര് ഹൈദര്ബെയ് ആസ്ഥാനത്ത് നടക്കുന്ന ആര്മി റിക്രൂട്ട്മെന്റ് റാലി ആക്രമിക്കാനുള്ള ലക്ഷ്യത്തോടെയാണ് ഭീകരരെത്തിയതെന്ന് ബാരാമുള്ള സീനിയര് സൂപ്രണ്ട് റയീസ് മുഹമ്മദ് ഭട്ട് പത്രസമ്മേളനത്തില് പറഞ്ഞു.
വെള്ളിയാഴ്ചയാണ് രണ്ട് ജെയ്ഷെ ഭീകരരെ സൈന്യം ഏറ്റുമുട്ടലില് വധിച്ചത്. അതിന് ഒരു ദിവസം മുമ്പ് ബാരാമുള്ളയില് രണ്ട് ബസുകള് മണിക്കൂറുകളുടെ വ്യത്യാസത്തില് സ്ഫോടനത്തില് തകര്ന്നിരുന്നു. ആളൊഴിഞ്ഞ ബസുകളായതിനാല് കൂടുതല് ദുരന്തങ്ങളുണ്ടായില്ല.
ബാരാമുള്ളയില് കൊല്ലപ്പെട്ട ഭീകരരെക്കുറിച്ച് കൂടുതല് വിവരങ്ങള് അന്വേഷിച്ചുവരികയാണെന്ന് റയീസ് ഭട്ട് പറഞ്ഞു. എകെ 47 ന്റെ പുതിയ പതിപ്പായ എകെ 74 യു ഇവരില് നിന്ന് കണ്ടെടുത്തിട്ടുണ്ട്, കൂടാതെ ഒരു എകെ റൈഫിള്, പിസ്റ്റള്, മൂന്ന് മാഗസിന്, രണ്ട് ബുള്ളറ്റുകള് എന്നിവയും കണ്ടെടുത്തു.
