കൊച്ചി: സംസ്ഥാന സര്ക്കാരിനും മുഖ്യമന്ത്രി പിണറായി വിജയനുമെതിരെ തുറന്നടിച്ച് ഗവര്ണര് ആരിഫ് മുഹമ്മദ് ഖാന്. മുഖ്യമന്ത്രിക്കെതിരെയുള്ള തെളിവുകള് നാളെ പുറത്തുവിടുമെന്നും അദ്ദേഹം പറഞ്ഞു.
കണ്ണൂര് സംഭവത്തില് കേസെടുക്കാതിരുന്നത് മുഖ്യമന്ത്രി പിണറായി വിജയന്റെ നിര്ദേശ പ്രകാരം ആണ്. തന്നെ ആക്രമിച്ച ദൃശ്യങ്ങള് നാളെ പുറത്തുവിടും. ഗവര്ണക്കെതിരെ ആക്രമണം നടക്കുമ്പോള് പരാതി കിട്ടിയിട്ട് വേണോ സര്ക്കാരിന് അന്വേഷിക്കാനെന്നും ഗവര്ണര് ചോദിച്ചു.
കേരളത്തിന്റെ മുഖ്യമന്ത്രിയെ ഓര്ത്ത് സഹതാപം മാത്രമേയുള്ളൂ. സര്വകലാശാലകളുടെ പ്രവര്ത്തനങ്ങളില് ഇടപെടില്ലെന്ന് കത്തിലൂടെ ഉറപ്പ് നല്കിയത് മുഖ്യമന്ത്രിയാണ്, എന്നാല് അദ്ദേഹത്തിന്റെ നേതൃത്വത്തില് ഇപ്പോള് പൂര്ണമായും സ്വതന്ത്ര നിലനില്പ്പിനെ ചോദ്യം ചെയ്ത് സര്വകലാശാലകളെ ഏറ്റെടുക്കുന്നതിനുള്ള നീക്കങ്ങളാണ് നടക്കുന്നതെന്ന് ഗവര്ണര് ആരോപിച്ചു. സര്വകലാശാലകളിലെ നിയമനവുമായി ബന്ധപ്പെട്ട് മുഖ്യമന്ത്രി പിണറായി വിജയന് തനിക്കയച്ച രണ്ട് കത്തുകള് മാധ്യമങ്ങളിലൂടെ പുറത്തുവിടുമെന്നും ഗവര്ണര് പറഞ്ഞു.
ഗവര്ണര് പോലും ഇന്നാട്ടില് സുരക്ഷിതനല്ലെന്നും അദേഹം പറഞ്ഞു. ഈ വിഷയത്തില് കേന്ദ്രത്തെ സമീപിക്കും. അതിനുള്ള ഘട്ടം ആയെന്നും ഗവര്ണര് ആരിഫ് മുഹമ്മദ് ഖാന് പറഞ്ഞു.
