പത്തനംതിട്ട: കന്നിമാസ പൂജകള്ക്കായി ശബരിമല ശ്രീധര്മ്മശാസ്താ ക്ഷേത്രനട ഇന്നലെ വൈകിട്ട് അഞ്ചിന് തുറന്നു. തന്ത്രി കണ്ഠര് മഹേഷ് മോഹനരുടെ സാന്നിധ്യത്തില് മേല്ശാന്തി എന്. പരമേശ്വരന് നമ്പൂതിരി നട തുറന്ന് ദീപങ്ങള് തെളിച്ചു. തുടര്ന്ന് ഉപദേവതാ ക്ഷേത്രനടകളും തുറന്നു. ശേഷം തന്ത്രി ഭക്തര്ക്ക് വിഭൂതി പ്രസാദം വിതരണം ചെയ്തു. മാളികപ്പുറം ക്ഷേത്രനടയും തുറന്നു.
പുലര്ച്ചെ 5ന് നിര്മ്മാല്യവും പതിവ് അഭിഷേകവും നടത്തും. 5.30ന് മഹാഗണപതിഹോമം. തുടര്ന്ന് നെയ്യഭിഷേകം. ഇന്നും നാളെയും സന്നിധാനത്ത് ലക്ഷാര്ച്ചന. ഉദയാസ്തമയപൂജ, അഷ്ടാഭിഷേകം, 25 കലശാഭിഷേകം, കളഭാഭിഷേകം, പടിപൂജ, പുഷ്പാഭിഷേകം എന്നിവ 21 വരെ ഉണ്ടാകും. 21ന് രാത്രി 10ന് ഹരിവരാസനം പാടി നട അടയ്ക്കും. വെര്ച്വല് ക്യൂവിലൂടെയും നിലയ്ക്കലിലെ സ്പോട്ട് ബുക്കിങ് കൗണ്ടറുകള് വഴിയും ദര്ശനത്തിനെത്താം.
