തിരുവനന്തപുരം: ഹിന്ദുമത വിശ്വാസങ്ങളെ അവഹേളിക്കുന്ന തരത്തില്‍ പരാമര്‍ശം നടത്തിയ നടന്‍ സുരാജ് വെഞ്ഞാറമൂടിനെതിരെ ഹിന്ദു ഐക്യവേദിയും പരാതി നല്‍കി. നടന്‍ സുരാജ് ഹിന്ദു വിശ്വാസങ്ങളെയും ആചാരങ്ങളേയും വ്രണപ്പെടുത്തിയെന്ന് ചൂണ്ടിക്കാട്ടി വെഞ്ഞാറമൂട് പോലീസിലാണ് പരാതി നല്‍കിയിരിക്കുന്നത്. ഹിന്ദു ഐക്യവേദി തിരുവനന്തപുരം ജില്ലാ അദ്ധ്യക്ഷന്‍ കിളിമാനൂര്‍ സുരേഷ്, സെക്രട്ടറി വഴയില ഉണ്ണി, സെക്രട്ടറി നെടുമങ്ങാട് ശ്രീകുമാര്‍ എന്നിവരാണ് പരാതിയുമായി പോലീസിനെ സമീപിച്ചത്.
ഫഌവഴ്‌സ് ചാനലിലെ കോമഡി ഉത്സവം എന്ന പരിപാടിയില്‍ അവതാരക കയ്യില്‍ ചരട് കെട്ടിയത് മോശമാണെന്ന് പറഞ്ഞ സുരാജ് ഹിന്ദു വിശ്വാസികളുടെയും, ആരാധനാ കേന്ദ്രമായ ശബരിമലയിലെ ശരംകുത്തിയാലിനെയും മോശമായി പരാമര്‍ശിച്ചതായി ഹിന്ദു ഐക്യവേദി നല്‍കിയ പരാതിയില്‍ പറയുന്നു. ഇത് ഹിന്ദു ആചാരങ്ങളെയും വിശ്വാസത്തെയും വ്രണപ്പെടുത്തുന്നതാണ്. സംഭവത്തില്‍ ഐപിസി 295 എ വകുപ്പ് പ്രകാരം സുരാജ് വെഞ്ഞാറമ്മൂടിനെതിരെ കേസ് എടുക്കണമെന്നും ഹിന്ദു ഐക്യവേദി ആവശ്യപ്പെട്ടു.
നേരത്തേ, സമാനമായ സംഭവത്തില്‍ പത്തനംതിട്ട സ്വദേശിയായ അഭിഭാഷകന്‍ മഹേഷ് റാമും പോലീസില്‍ പരാതി നല്‍കിയിരുന്നു. സുരാജ് വെഞ്ഞാറമൂടിന് പുറമേ കോമഡി ഉത്സവത്തിന്റെ പ്രോഗ്രാം എഡിറ്റര്‍, ചീഫ് എഡിറ്റര്‍ എന്നിവര്‍ക്കെതിരെയും പരാതി നല്‍കിയിരുന്നു. കോമഡി ഉത്സവം പരിപാടിയില്‍ അവതാരക അശ്വതി ശ്രീകാന്ത് കയ്യില്‍ ചരട് കെട്ടിയെത്തിയതിനോട് ആയിരുന്നു സുരാജ് വെഞ്ഞാറമ്മൂടിന്റെ കളിയാക്കല്‍. ചിലര്‍ ആലിലൊക്കെ അനാവശ്യമായി ചരട് കെട്ടിവെച്ചിരിക്കുന്നത് പോലെയുണ്ടെന്നായിരുന്നു നടന്‍ പറഞ്ഞത്. ശരംകുത്തിയാലില്‍ പോലും ഇത്രയും ചരടുകള്‍ കാണില്ലെന്നായിരുന്നു സുരാജിന്റെ പരിഹാസം.
