ആലപ്പുഴ: ശക്തമായ ഒഴുക്കില്‍ അച്ചന്‍കോവിലാറ്റില്‍ പള്ളിയോടം മറിഞ്ഞ് പ്ലസ് ടു വിദ്യാര്‍ത്ഥി ഉള്‍പ്പെടെ രണ്ടുപേര്‍ മരിച്ചു, രണ്ടുപേരെ കാണാനില്ല. ചെന്നിത്തല സൗത്ത് പരിയാരത്ത് സതീശന്റെ മകന്‍ ആദിത്യ(17)നും ചെറുകോല്‍ സ്വദേശി വിനീഷുമാണ് മരിച്ചത്. പ്ലസ് ടു വിദ്യാര്‍ത്ഥിയാണ് ആദിത്യന്‍. ആറന്മുള ഉത്രട്ടാതി വള്ളംകളിയില്‍ പങ്കെടുക്കുന്നതിനായി നീറ്റിലിറക്കിയ ചെന്നിത്തല കരയുടെ പള്ളിയോടമാണ് മറിഞ്ഞത്.
ഇന്ന് രാവിലെ 8.30ന് വലിയ പെരുംമ്പുഴ കടവില്‍ വച്ചായിരുന്നു അപകടം. ആറന്മുളയ്‌ക്കു പുറപ്പെടുന്നതിനു മുമ്പായി പള്ളിയോടം മുന്നിലേയ്‌ക്ക് പോയി തിരികെ വരുന്ന ചടങ്ങുണ്ട്. ഇതിനായി പള്ളിയോടം തിരിക്കുന്നതിനിടെയാണ് മറിഞ്ഞത്. പള്ളിയോടത്തിൽ അമ്പതിലേ റെ ആളുകൾ ഉണ്ടായിരുന്നുവെന്നാണ് വിവരം. പ്രദക്ഷിണ സമയത്ത് തുഴച്ചിലുകാർ അല്ലാത്തവരും വഴിപാടായി വള്ളത്തിൽ കയറിയിരുന്നു. അറുപത് തുഴച്ചിലുകാർ കയറുന്ന പള്ളിയോടമാണിത്.
അഗ്നിരക്ഷാസേന, സ്കൂബ ഡൈവിംഗ് ടീം, പോലീസ് എന്നിവരുടെ നേതൃത്വത്തില്‍ നടത്തിയ തെരച്ചിലിൽ പള്ളിയോടത്തിന് 50 മീറ്റർ ദൂരെ മാറി ആദിത്യന്റെ മൃതദേഹം കണ്ടെത്തി. തുടർന്ന് ബിനീഷിന്റെ മൃതദേഹവും കണ്ടെടുക്കുകയായിരുന്നു. മൃതദേഹങ്ങൾ താലൂക്ക് ആശുപത്രിയിലേക്ക് മാറ്റി. എംഎല്‍എമാരായ രമേശ് ചെന്നിത്തല, സജി ചെറിയാന്‍ എന്നിവര്‍ പള്ളിയോടം പുറപ്പെടുന്ന ചടങ്ങിന് എത്തിയിരുന്നു.
