കൊച്ചി : കണ്ണൂര് സര്വകലാശാല അസോസിയേറ്റ് പ്രൊഫസര് നിയമനത്തിനുള്ള യോഗ്യതാ മാനണ്ഡമായ പരിചയമായി ഗവേഷണകാലത്തെ കണക്കാക്കാനാവില്ലെന്ന് യുജിസി. മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ. രാഗേഷിന്റെ ഭാര്യ പ്രിയ വര്ഗീസ് അസോസിയേറ്റ് പ്രൊഫസര് നിയമനത്തിനായി ഗവേഷണം നടത്തുന്ന കാലയളവും അധ്യാപന പരിചയമായി ഉള്പ്പെടുത്തിയിരുന്നു. യുജിസിയുടെ പുതിയ ഉത്തരവ് പ്രിയ വര്ഗീസിന് തിരിച്ചടിയായിരിക്കുകയാണ്.
പ്രിയ വര്ഗീസിന്റെ നിയമനം ചോദ്യം ചെയ്ത് അസോസിയേറ്റ് പ്രൊഫസര് തസ്തികയിലെ നിയമനം ചോദ്യം ചെയ്ത് രണ്ടാം റാങ്കുകാരനായ ഉദ്യോഗാര്ത്ഥി നല്കിയ പരാതിയില് പരിഗണിക്കവേ യുജിസി ഹൈക്കോടതിയില് അറിയിച്ചതാണ് ഇക്കാര്യം. നിയമനത്തിന് തസ്തികയ്ക്ക് നിശ്ചയിച്ച മിനിമം വിദ്യാഭ്യാസ യോഗ്യത നേടിയ ശേഷമുള്ള പ്രവൃത്തി പരിചയമാണ് അടിസ്ഥാന യോഗ്യതയായി പരിഗണിക്കേണ്ടതെന്നും യുജിസി കോടതിയില് അറിയിച്ചു.
യുജിസി ചട്ട പ്രകാരം അസോസിയേറ്റ് പ്രൊഫസര് നിയമനത്തിന് പിഎച്ച്ഡിയും എട്ട് വര്ഷത്തെ അധ്യാപന പരിചയവുമാണ് വേണ്ടത്. കെകെ രാഗേഷിന്റെ ഭാര്യ പ്രിയാ വര്ഗീസിന് പിഎച്ച്ഡി കിട്ടിയത് 2019 ലാണ്. പക്ഷേ അവര് അധ്യാപികയായി തൃശൂര് കേരള വര്മ്മ കോളേജില് പ്രവേശിച്ച 2012 മുതലുള്ള അധ്യാപന പരിചയാണ് അസോസിയേറ്റ് പ്രൊഫസര് തസ്തികയിലേക്കുള്ള അപേക്ഷയില് സമര്പ്പിച്ചിരിക്കുന്നതെന്നും കോടതിക്ക് വ്യക്തമായിട്ടുണ്ട്. ഇതിന്റെ അടിസ്ഥാനത്തില് പ്രിയ വര്ഗീസിന്റെ നിയമനത്തിന് നേരത്തെ ഇടക്കാല സ്റ്റേ നല്കിയ ഹൈക്കോടതി ഇത് ഒരു മാസം കൂടി നീട്ടി.
മുമ്പ് ഈ ഹര്ജി പരിഗണിക്കേവേ ഇക്കാര്യം രേഖമൂലം നല്കാന് സിംഗിള് ബെഞ്ച് യുജിസിക്ക് നിര്ദ്ദേശം നല്കിയിരുന്നു. വിഷയത്തില് നേരത്തെ ചാന്സലറായ ഗവര്ണ്ണര്, വൈസ് ചാന്സലര്, സര്ക്കാര് അടക്കമുള്ളവരില് നിന്നും കോടതി വിശദീകരണവും തേടിയിരുന്നു.
അതേസമയം തനിക്ക് അസോസിയേറ്റ് പ്രൊഫസര് ആയി നിയമനം നല്കണമെന്ന് ആവശ്യപ്പെട്ട് രണ്ടാം റാങ്കുകാരന് ഡോ.ജോസഫ് സ്കറിയ മറ്റൊരു ഹര്ജി കൂടി നല്കിയിട്ടുണ്ട്. എന്നാല് ജോസഫ് സ്കറിയയുടെ ആവശ്യം കോടതി നടപടികളുടെ ദുരുപയോഗമാണെന്നാണ് കണ്ണൂര് സര്വകലാശാല നിലപാട് സ്വീകരിച്ചത്. കേസ് വീണ്ടും പരിഗണിക്കും
