കൊച്ചി: കൊച്ചി മെട്രോയുടെ ഭാഗമായുള്ള പേട്ട മുതൽ എസ്.എൻ.ജംഗ്ഷൻ വരെയുള്ള 1.7 കിലോമീറ്റര് ദൂരത്തിലെ സര്വ്വീസ് നാളെ പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. നാളെ വൈകിട്ട് ആറ് മണിക്ക് സിയാൽ കണ്വൻഷൻ സെൻ്ററിൽ വച്ചാകും പദ്ധതിയുടെ ഉദ്ഘാടനം നടക്കുക. മുഖ്യമന്ത്രി പിണറായി വിജയനും ഗവര്ണര് ആരിഫ് മുഹമ്മദ് ഖാനും ചടങ്ങിൽ പങ്കെടുക്കും.
ഉദ്ഘാടനത്തിന്റെ വിവരം ഇന്ന് രാവിലെയാണ് സർക്കാർ പുറത്തുവിട്ടത്. രണ്ടു ദിവസത്തെ സന്ദർശനത്തിനായി നാളെ വൈകിട്ടാണ് പ്രധാനമന്ത്രി കൊച്ചിയിൽ എത്തുക. ഡി എം ആർ സിയുമായുള്ള കാരാർ അവസാനിപ്പിച്ച ശേഷം കെ എം ആർ എൽ ആദ്യമായി നിർമ്മിച്ച പാതയാണ് പേട്ട – എം.എൻ ജംഗ്ഷൻ. പാതയിൽ നേരത്തെ തന്നെ സുരക്ഷാ പരിശോധന അടക്കമുള്ള നടപടികൾ പൂര്ത്തിയായിരുന്നു. മെട്രോ റെയിൽ സേഫ്റ്റി കമ്മീഷണർ അഭയ് റായിയുടെ നേതൃത്വത്തിലുള്ള സംഘമാണ് 1.8 കിലോമീറ്റര് ദൈര്ഘ്യമുള്ള പുതിയ പാതയില് പരിശോധന നടത്തിയത്.
ട്രെയിൻ ഓടിച്ചു നോക്കിയും അനുബന്ധ സംവിധാനങ്ങളുടെ പ്രവര്ത്തനങ്ങള് പരിശോധിക്കുകയുമാണ് സംഘം ചെയ്തത്. പുതിയതായി തുറക്കുന്ന വടക്കേക്കോട്ട,എസ്.എൻ ജംഗ്ഷൻ എന്നീ സ്റ്റേഷനുകളിലെ എസ്കലേറ്റര്,പ്ലാറ്റ് ഫോം സൗകര്യങ്ങള്, സിഗ്നലിംഗ്, സ്റ്റേഷൻ കണ്ട്രോള് റൂം, അഗ്നി സുരക്ഷാ ഉപകരണങ്ങള് എന്നിവയെല്ലാം സംഘം പരിശോധിച്ചു.
