ന്യൂദല്ഹി : പഞ്ചാബ് സന്ദര്ശനത്തിനിടെ പ്രധാനമന്ത്രി നരേന്ദ്രമോദിയുടെ സുരക്ഷയില് പാളീച്ചയുണ്ടായത് സംബന്ധിച്ച് റിട്ടയേര്ഡ് ജസ്റ്റിസ് ഇന്ദു മല്ഹോത്രയുടെ നേതൃത്വത്തിലുള്ള സംഘം അന്വേഷണ റിപ്പോര്ട്ട് സുപ്രീം കോടതിയില് സമര്പ്പിച്ചു. വലിയ സുരക്ഷ വീഴ്ചയാണ് പഞ്ചാബില് പ്രധാനമന്ത്രിക്ക് നേരിടേണ്ടി വന്നതെന്ന് റിപ്പോര്ട്ടില് പറയുന്നു. പഞ്ചാബ് പോലീസ് വലിയ അലംഭാവം ആണ് സുരക്ഷ കാര്യത്തില് കാട്ടിയത്. ഇത്തരം സംഭവങ്ങള് മുന്നിര്ത്തി പ്രധാനമന്ത്രി നരേന്ദ്ര മോദിയുടെ സുരക്ഷ സംവിധാനങ്ങള് വലിയ തോതില് വര്ധിപ്പിക്കണമെന്നും റിപ്പോര്ട്ടില് വ്യക്തമാക്കി.
ദേശീയാന്വേഷണ ഏജന്സിയിലെ ഓഫീസര്മാരും പഞ്ചാബ് പോലീസിലെ ഉന്നത ഉദ്യോഗസ്ഥരും അന്വേഷണ സംഘത്തിലുണ്ടായിരുന്നു. പ്രധാനമന്ത്രിയുടെ വാഹനവ്യൂഹം കടന്നുപോകുമ്പോള് സുരക്ഷാ വീഴ്ച സംഭവിച്ചത് എങ്ങനെയെന്ന് കണ്ടെത്തി ജസ്റ്റിസ് ഇന്ദു മല്ഹോത്ര അധ്യക്ഷയായ സമിതിയുടെ റിപ്പോര്ട്ട് നല്കണമെന്നായിരുന്നു സുപ്രീംകോടതി നിര്ദേശം. ഒരു ഭാഗത്തിനെ അനുകൂലിച്ചുകൊണ്ടുള്ള അന്വേഷണമല്ല, സ്വതന്ത്രാന്വേഷണമാണ് ഈ കേസില് വേണ്ടത്. സുരക്ഷാവീഴ്ചയുടെ കാരണമെന്താണെന്നും ആരാണ് ഉത്തരവാദിയെന്നും ഭാവിയില് ഇത്തരം വീഴ്ചകള് ഉണ്ടാകാതിരിക്കാന് എന്തൊക്കെ സുരക്ഷാ മുന്കരുതലുകള് വേണമെന്നും സമിതി നിര്ദ്ദേശിക്കേണ്ടതാണ്. എത്രയും പെട്ടെന്ന് റിപ്പോര്ട്ട് തയ്യാറാക്കി നല്കണമെന്നും സുപ്രീംകോടതി ആവശ്യപ്പെട്ടിരുന്നു.
ഫിറോസ്പൂരില് നടക്കാനിരുന്ന റാലിയില് പങ്കെടുക്കാനായി യാത്ര തിരിക്കവേയാണ് പ്രതിഷേധക്കാര് പ്രധാനമന്ത്രിയുടെ യാത്ര തടയുകയായിരുന്നു. ഗതാഗത തടസ്സത്തെ തുടര്ന്ന് പതിനഞ്ച് മിനിട്ടോളം പ്രധാനമന്ത്രി ഫ്ളൈ ഓവറില് കുടുങ്ങി കിടക്കുകയും ചെയ്തു. തുടര്ന്ന് മോദി പൊതു ചടങ്ങില് പങ്കെടുക്കാതെ മടങ്ങുകയായിരുന്നു. സംഭവത്തില് സംസ്ഥാന സര്ക്കാരിനെതിരെ രൂക്ഷ വിമര്ശനങ്ങളാണ് ഉയര്ന്നത്. കേന്ദ്ര സംസ്ഥാന സര്ക്കാരുകള് സംഭവം അന്വേഷിക്കാന് പ്രത്യേക അന്വേഷണസംഘങ്ങളെ നിയോഗിച്ചതിനിടയിലാണ് സ്വതന്ത്രാന്വേഷണം ആവശ്യമെന്ന് ചൂണ്ടിക്കാട്ടി സുപ്രീംകോടതി ഒരു അന്വേഷണസമിതി രൂപീകരിച്ചതും അവര് റിപ്പോര്ട്ട് നല്കിയതും.
