കോഴിക്കോട്: പേരാമ്പ്ര കൂത്താളിയില് തെരുവ് നായയുടെ കടിയേറ്റ വീട്ടമ്മ വാക്സിനെടുത്തിട്ടും മരിച്ചു. പുതിയേടത്ത് ചന്ദ്രിക (53) യാണ് ചികിത്സയിലിരിക്കെ കോഴിക്കോട് മെഡിക്കല് കോളേജ് ആശുപത്രിയില് മരിച്ചത്. കഴിഞ്ഞ മാസം 21 നാണ് ഇവരുടെ മുഖത്ത് തെരുവ് നായയുടെ കടിയേറ്റത്. അതിന് ശേഷം പേവിഷബാധക്കെതിരെ എല്ലാ ഡോസ് വാക്സിനുകളും കൃത്യമായി എടുത്തിരുന്നതായി ബന്ധുക്കള് അറിയിച്ചു. പത്ത് ദിവസം മുമ്പ് ഇവര്ക്ക് പനിയും അണുബാധയുമുണ്ടായി. പേവിഷബാധയുടെ ലക്ഷണങ്ങളും പ്രകടിപ്പിച്ചു. ഇതോടെയാണ് കോഴിക്കോട് മെഡിക്കല് കോളേജ് ആശുപത്രിയിലെ ഡോക്ടര്മാര് സംശയം പ്രകടിപ്പിച്ചതെന്നാണ് മെഡിക്കല് കോളേജ് അധികൃതരില് നിന്നും ലഭിച്ച വിവരം. ചന്ദ്രികക്ക് ഒപ്പം മറ്റ് നാല് പേരെയും തെരുവ് നായ കടിച്ചിരുന്നുവെങ്കിലും ആര്ക്കും രോഗലക്ഷണങ്ങളില്ല. ഇവരെ കടിച്ച നായക്ക് പേവിഷബാധയുണ്ടെന്ന് നേരത്തെ സ്ഥിരീകരിച്ചിരുന്നു. ചന്ദ്രികക്ക് പേവിഷ ബാധ ഉണ്ടായോ എന്നതില് പരിശോധന ഫലങ്ങള് വരാനുണ്ടെന്നാണ് ആരോഗ്യവകുപ്പ് അധികൃതര് പറയുന്നത്. സംസ്ഥാനത്ത് നായയുടെ കടിയേറ്റവര് വാക്സീനെടുത്തിട്ടും മരിക്കുന്ന രണ്ടാമത്തെ സംഭവമാണ് റിപ്പോര്ട്ട് ചെയ്യപ്പെടുന്നത്.
തെരുവുനായയുടെ കടിയേറ്റു; പേ വിഷബാധക്കെതിരായ വാക്സിനെടുത്തിട്ടും വീട്ടമ്മ പേവിഷബാധയേറ്റ് മരിച്ചു
സംസ്ഥാനത്ത് നായയുടെ കടിയേറ്റവര് വാക്സീനെടുത്തിട്ടും മരിക്കുന്ന രണ്ടാമത്തെ സംഭവമാണ് റിപ്പോര്ട്ട് ചെയ്യപ്പെടുന്നത്.
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.