നാദാപുരം : വിദേശത്തു നിന്നും കരിപ്പൂര്‍ വിമാനത്താവളത്തില്‍ ഇറങ്ങിയിച്ച് 20 ദിവസം പിന്നിട്ടു. വീട്ടില്‍ എത്തിയില്ലെന്ന് പരാതി. നാദപുരം ചാലപ്രം സ്വദേശി ചക്കരകക്കണ്ടിയില്‍ അനസിനെയാണ് (28) കാണാതായത്. സംഭവത്തില്‍ മാതാവ് സുലൈഖ പരാതി നല്‍കിയതിന്റെ അടിസ്ഥാനത്തില്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
അഞ്ച് മാസം മുന്‍പാണ് അനസ് വിദേശത്തേക്കു പോയത്. കഴിഞ്ഞ ജൂലൈ 21ന് മലപ്പുറം സ്വദേശിയെന്ന് സ്വയം പരിചയപ്പെടുത്തി ഒരാള്‍ കല്ലാച്ചി ഈയ്യങ്കോട്ടെ അനസിന്റെ ബന്ധുവീട്ടില്‍ അനസിനെ തിരക്കിയെത്തിയിരുന്നു. അനസ് വിദേശത്താണെന്നു ബന്ധു അറിയച്ചപ്പോള്‍, ജൂലൈ 20ന് അനസ് കരിപ്പൂര്‍ വിമാനത്താവളത്തില്‍ എത്തിയെന്ന് ഇയാള്‍ അറിയിക്കുകയായിരുന്നു.
ഇതോടെയാണ് അനസിന്റെ പരാതിയുമായി പോലീസിനെ സമീപിക്കുന്നത്. രണ്ടാഴ്ച കഴിഞ്ഞിട്ടും മകന്‍ വീട്ടിലെത്താത്തതില്‍ ദുരൂഹതയുണ്ടെന്നും പരാതിയില്‍ പറയുന്നു.
അതേസമയം യുവാവ് മാറി നില്‍ക്കുന്നതിന് പിന്നില്‍ സ്വര്‍ണക്കടത്ത് ഇടപാടുമായി ബന്ധപ്പെട്ട് ആണോ, അതോ ബന്ധുക്കളില്‍ നിന്നും എന്തെങ്കിലും കാരണം കൊണ്ട് മാറി നില്‍്ക്കുന്നതാണോയെന്നും സംശയമുണ്ട്. സംഭവത്തില്‍ അന്വേഷണം ആരംഭിച്ചതായും പോലീസ് അറിയിച്ചു.
