കൊല്ലം: മഹാത്മാഗാന്ധി ദേശീയ ഗ്രാമീണ തൊഴിലുറപ്പുമായി ബന്ധപ്പെട്ട് വെട്ടിക്കവല ഗ്രാമപഞ്ചായത്തിലെ ചില വാര്‍ഡുകളില്‍ മെമ്പര്‍മാരുടെ ഒത്താശയോടെ നടക്കുന്ന അഴിമതിക്കെതിരെയും സ്വജനപക്ഷപാതത്തിനെതിരെയും ബിജെപി കുന്നിക്കോട് മണ്ഡലം അധ്യക്ഷന്‍ ബൈജു തോട്ടശ്ശേരിയുടെ നേതൃത്വത്തില്‍ പഞ്ചായത്ത് സെക്രട്ടറിക്ക് പരാതി നല്‍കി.
ഓരോ വാര്‍ഡിലും ജോലി ചെയ്യുന്നവരെ വ്യക്തിവിരോധത്തിന്റെ പേരില്‍ യാതൊരു മാനദണ്ഡവും പാലിക്കാതെ മറ്റു സ്ഥലങ്ങളിലേക്ക് മാറ്റുകയും തൊഴിലാളികളുടെ അനുമതിയില്ലാതെ മെമ്പറിടപ്പെട്ട് മസ്‌റോളില്‍ നിന്നും പേരുകള്‍ വെട്ടിമാറ്റുന്നതിനാല്‍ തങ്ങളുടെ പേരുകള്‍ ഏത് മസ്റ്റര്‍റോളിലാണെന്നറിയാതെ തൊഴിലാളികള്‍ ബുദ്ധിമുട്ടുകയാണ്. ഈ പരാതിയിന്മേല്‍ നടപടികള്‍ എടുക്കാത്ത പക്ഷം ഇതിനെതിരെ ശക്തമായ സമരനടപടികളുമായി ബിജെപി മുന്നോട്ട് പോകുമെന്നും അറിയിച്ചു.
മണ്ഡലം ജനറല്‍ സെക്രട്ടറിമാരായ ജി. ബാഹുലേയന്‍, എസ്. സുരേഷ്ബാബു, വെട്ടിക്കവല പഞ്ചായത്ത് ജനറല്‍ സെക്രട്ടറി അരുണ്‍ ചന്ദ്രശേഖരന്‍, ചക്കുവരയ്‌ക്കല്‍ ഏരിയ സെക്രട്ടറി പ്രമോദ്, മീഡിയ സെല്‍ കണ്‍വീനര്‍ രമ്യ കൃഷ്ണന്‍, രാജന്‍ കാവുങ്കല്‍, ദീപു രാജ്, അജേഷ്, ശ്രീദേവി രാജന്‍, മണിക്കുട്ടന്‍ തുടങ്ങിയവര്‍ പങ്കെടുത്തു.
