അരിയിൽ ഷുക്കൂർ വധക്കേസിൽ ഏഴു പ്രതികൾക്ക് ജീവപര്യന്തം ശിക്ഷ ലഭിച്ചപ്പോഴും സിപിഎം നേതാക്കളായ പി. ജയരാജനും ടി.വി. രാജേഷും ഉൾപ്പെടെ 18 പേരെ വെറുതെവിട്ടുകൊണ്ടുള്ള വിധി മുസ്ലിം ലീഗ് നേതൃത്വത്തിന് കനത്ത പ്രഹരമാണ്. കേസ് നടത്തിപ്പിൽ ലീഗ് നേതൃത്വം ബോധപൂർവ്വം വീഴ്ച വരുത്തിയതാണ് ഇങ്ങനെയൊരു വിധിയുണ്ടാവാൻ കാരണമെന്നാണ് പാർട്ടിയിലെ വലിയൊരു വിഭാഗം കരുതുന്നത്. ലീഗിന്റെ വിദ്യാർത്ഥി സംഘടനയായ എം എസ് എഫിന്റെ പ്രവർത്തകനായിരുന്ന ഷുക്കൂറിനെ സിപിഎമ്മുകാർ വിചാരണ ചെയ്ത് അതിക്രൂരമായി കൊലപ്പെടുത്തി എന്നായിരുന്നു കേസ്. കേസിന്റെ കാര്യത്തിൽ നേതൃത്വം മതിയായ താൽപ്പര്യം കാണിക്കുന്നില്ലെന്ന് ലീഗ് അണികളിൽ നിന്നുതന്നെ വിമർശനം ഉണ്ടായിരുന്നു. സാക്ഷിമൊഴികൾ ഉണ്ടായിരുന്നിട്ടും ജയരാജനും രാജേഷിനുമെതിരെ ഗൂഢാലോചനാ കുറ്റം ചുമത്തിയില്ലെന്ന കാര്യം ചൂണ്ടിക്കാട്ടി ഷുക്കൂറിന്റെ അമ്മ ആത്തിക്ക ഹൈക്കോടതിയിൽ നൽകിയ ഹർജിയെ തുടർന്നാണ് കേസ് സിബിഐക്ക് വിട്ടത്.
ആദ്യം ലോക്കൽ പോലീസ് അന്വേഷിച്ച കേസിൽ പി. ജയരാജനും ടി.വി. രാജേഷിനുമെതിരെ ഗൂഢാലോചനാകുറ്റം ചുമത്തുന്നതിന് പകരം, കുറ്റകൃത്യം നടക്കുമെന്ന് അറിഞ്ഞിട്ടും തടയാൻ ശ്രമിച്ചില്ലെന്ന വകുപ്പാണ് ചുമത്തിയത്. സംഘർഷ സമയത്ത് ആശുപത്രിയിൽ ചികിത്സ തേടിയിരുന്ന ജയരാജന്റെയും രാജേഷിന്റെയും നിർദ്ദേശപ്രകാരമാണ് സിപിഎമ്മുകാർ ഷുക്കൂറിനെ വധിച്ചതെന്നായിരുന്നു സിബിഐ കുറ്റപത്രം. ആകെയുള്ള 31 പ്രതികളിൽ 13 പേർക്ക് മാത്രമാണ് ശിക്ഷ ലഭിച്ചത്. ഇതിൽ ആറുപേർക്ക് ലഭിച്ചത് രണ്ടു വർഷത്തെ ശിക്ഷ മാത്രം. ഇവർക്ക് ജാമ്യവും ലഭിച്ചു. ശിക്ഷിക്കപ്പെട്ട എല്ലാവരും തന്നെ സാധാരണ സിപിഎമ്മുകാരാണ്. നേതാക്കൾ രക്ഷപ്പെട്ടു. ഇതാണ് പലരിലും സംശയം സൃഷ്ടിച്ചിട്ടുള്ളത്. എന്തുകൊണ്ട് ഇങ്ങനെ സംഭവിച്ചു എന്നതിൽ കൃത്യമായ വിശദീകരണം നൽകാൻ ലീഗ് നേതൃത്വത്തിന് കഴിയുന്നുമില്ല.
ജയരാജനും രാജേഷിനും എതിരെ മൊഴി നൽകിയ സാക്ഷികൾ കോടതിയിൽ ഹാജരാകാതിരുന്നത് ലീഗ് അണികളെ ഞെട്ടിച്ചിരുന്നു. ലീഗ് നേതൃത്വവും സിപിഎം നേതാക്കളും തമ്മിലുള്ള ധാരണയുടെ അടിസ്ഥാനത്തിലാണ് ഇതെന്ന് പറയപ്പെടുന്നു. ജയരാജനെതിരെ രണ്ടു സാക്ഷികളാണുണ്ടായിരുന്നത്. രണ്ടുപേരും കോടതിയിൽ ഹാജരായില്ല. ഇരുവരും ലീഗ് പ്രവർത്തകരാണ്. അവരെ എത്തിക്കാൻ പാർട്ടി നേതൃത്വം ശ്രമിക്കേണ്ടതായിരുന്നു. അങ്ങനെ സംഭവിക്കാത്തതിൽ ദുരൂഹതയുണ്ടെന്നാണ് ഷുക്കൂറിന്റെ അഭിഭാഷകൻ വിധി വന്നതിനുശേഷം പറഞ്ഞത്. പോലീസ് അന്വേഷണത്തിൽ ഒത്തുകളി നടന്നുവെന്നും, ജയരാജനെതിരെ പോലീസ് ഗൂഢാലോചനാ കുറ്റം ചുമത്താതിരിക്കാൻ ലീഗ് നേതാവ് പി.കെ. കുഞ്ഞാലിക്കുട്ടി ഇടപെട്ടെന്ന് കരുതുന്നതായും അഭിഭാഷകൻ വെളിപ്പെടുത്തി.
കേസ് അന്വേഷണ സമയത്ത് ഗൂഢാലോചനാ കുറ്റം ചുമത്താൻ ആവശ്യപ്പെട്ടെങ്കിലും പോലീസ് ചെയ്തില്ലെന്നും ഷുക്കൂറിന്റെ അഭിഭാഷകൻ പറയുന്നു. ഇതിനു കാരണം രാഷ്ട്രീയ സ്വാധീനമാണെന്ന് കുറ്റപ്പെടുത്തുകയും ചെയ്യുന്നു. തനിക്ക് കിട്ടിയ വിവരപ്രകാരം കേസിൽ കുഞ്ഞാലിക്കുട്ടി ഇടപെട്ടുവെന്നും, കേസ് മോശമല്ലാത്ത രീതിയിൽ സിബിഐ അന്വേഷിച്ചെങ്കിലും സാക്ഷികൾ കൂറുമാറിയാൽ സിബിഐയ്ക്ക് ഒന്നും ചെയ്യാനാകില്ലെന്നും അഭിഭാഷകൻ പറയുന്നു. ഇതോടെ ലീഗ് നേതൃത്വം പൂർണമായും പ്രതിക്കൂട്ടിലായി.
വിധി വന്നപ്പോഴുള്ള ലീഗ് നേതാക്കളുടെ, പ്രത്യേകിച്ച് പി.കെ. കുഞ്ഞാലിക്കുട്ടിയുടെ, പ്രതികരണങ്ങളും സംശയം ജനിപ്പിക്കുന്നതാണ്. വിധി വലിയ തിരിച്ചടിയായിരുന്നിട്ടും, ചിലർ ശിക്ഷിക്കപ്പെട്ടല്ലോ എന്നു പറഞ്ഞ് ലളിതവൽക്കരിക്കുകയാണ് കുഞ്ഞാലിക്കുട്ടി ചെയ്തത്. ഇത് അണികളെ കബളിപ്പിക്കാനാണ്. ഐസ്ക്രീം കേസിന്റെ കാലത്തു തന്നെ സിപിഎം-ലീഗ് അന്തർധാര ചർച്ചയായതാണ്. ഷുക്കൂറിന്റെ കൊലപാതക കേസിൽ സിപിഎം നേതാക്കളെ രക്ഷപ്പെടുത്താൻ ലീഗ് നേതാക്കൾ ശ്രമിച്ചെന്ന ആരോപണം, ആ പാർട്ടിയിൽ വലിയ പൊട്ടിത്തെറികൾക്ക് കാരണമാകും. സ്വന്തം അണികളെ വഞ്ചിച്ചും ബലികൊടുത്തും സിപിഎം നേതാക്കളെ രക്ഷിക്കുന്ന ലീഗ് നേതൃത്വം രാഷ്ട്രീയമായി വിചാരണ ചെയ്യപ്പെടും എന്നുറപ്പാണ്.


















