ന്യൂദല്ഹി: 2022ലെ ലോക ഹെപ്പറ്റൈറ്റിസ് ദിനത്തോടനുബന്ധിച്ച് പാര്ലമെന്റംഗങ്ങളെ മഞ്ഞപ്പിത്ത രോഗത്തെ കുറിച്ച് ബോധവല്ക്കരിക്കാന് ഉപരാഷ്ട്രപതിയും രാജ്യസഭാ ചെയര്മാനുമായ വെങ്കയ്യ നായിഡുവും ലോക്സഭാ സ്പീക്കര് ഓം ബിര്ളയും ചേര്ന്ന് ഒരു പരിപാടിക്ക് നേതൃത്വം നല്കി. കേന്ദ്ര ആരോഗ്യ കുടുംബ ക്ഷേമ മന്ത്രി മന്സുഖ് മാണ്ഡവ്യ സദസ്സിനെ അഭിസംബോധന ചെയ്തു.
‘ഹെപ്പറ്റൈറ്റിസ് പരിചരണം നിങ്ങളിലേക്ക് എത്തിക്കുക’ എന്നതാണ് ഈ വര്ഷത്തെ പ്രമേയം. ഇന്ത്യന് പാര്ലമെന്റും ഇന്സ്റ്റിറ്റിയൂട്ട് ഓഫ് ലിവര് & ബൈലിയറി സയന്സസും സംയുക്തമായി പാര്ലമെന്ററി റിസര്ച്ച് ആന്ഡ് ട്രെയിനിംഗ് ഇന്സ്റ്റിറ്റിയൂട്ട് ഫോര് ഡെമോക്രസീസിലാണ് പരിപാടി സംഘടിപ്പിച്ചത്.
ഹെപ്പറ്റൈറ്റിസ് വിഷയത്തില് ഉപരാഷ്ട്രപതി അഗാധമായ ഉത്കണ്ഠ രേഖപ്പെടുത്തുകയും ഹെപ്പറ്റൈറ്റിസ് രഹിത ഇന്ത്യക്കായി എല്ലാ പാര്ലമെന്റംഗങ്ങളും തങ്ങളുടെ നിയോജകമണ്ഡലങ്ങളില് പ്രവര്ത്തിക്കാനും കൂടുതല് കാര്യക്ഷമമാകും വിധം പ്രാദേശിക ഭാഷകളില് സന്ദേശം പ്രചരിപ്പിക്കാനും ആഹ്വാനം ചെയ്തു.
മഞ്ഞപ്പിത്തത്തിനെതിരെ കൂട്ടായ പ്രവര്ത്തനത്തിന് ആഹ്വാനം ചെയ്ത ലോക്സഭാ സ്പീക്കര് ഓം ബിര്ള, തങ്ങളുടെ നിയോജകമണ്ഡലങ്ങളില് ഹെപ്പറ്റൈറ്റിസ് രോഗികളെ തിരിച്ചറിയുകയും നിരീക്ഷിക്കുകയും ചെയ്യുന്നുണ്ടെന്ന് ഉറപ്പുവരുത്തുകയും ചികിത്സയ്ക്കിടെയും ശേഷവും രോഗികളുടെ ആവശ്യങ്ങള് നിറവേറ്റുകയും ചെയ്യേണ്ടത് ജനപ്രതിനിധികളുടെ ഉത്തരവാദിത്തമാണെന്ന് പറഞ്ഞു.
മഞ്ഞപിത്തം യഥാസമയം ചികിത്സിക്കുന്നതിന് നേരത്തേ തന്നെ കണ്ടെത്തേണ്ടതിന്റെ പ്രാധാന്യം കേന്ദ്ര ആരോഗ്യമന്ത്രി ഡോ.മന്സുഖ് മാണ്ഡവ്യ എടുത്തുപറഞ്ഞു. ഒരു വര്ഷത്തില് എച്ച്ഐവി ബാധിച്ച് മരിക്കുന്നവരുടെ എണ്ണത്തേക്കാള് കൂടുതലാണ് ഒരു ദിവസം ഹെപ്പറ്റൈറ്റിസ് ബി ബാധിച്ച് മരിക്കുന്നവരുടെ എണ്ണം എന്ന് ഡോ മാണ്ഡവ്യ എടുത്തുപറഞ്ഞു. ലോകത്ത് ഒരു ദിവസം ഏകദേശം 4000 പേര് വൈറല് ഹെപ്പറ്റൈറ്റിസ് ബാധിച്ച് മരിക്കുന്നു. ഇന്ത്യയില് ഏകദേശം 40 ദശലക്ഷം ആളുകള് ഹെപ്പറ്റൈറ്റിസ് ബി, സി ബാധിതരാണെന്നും അദ്ദേഹം കൂട്ടിച്ചേര്ത്തു.
ഹെപ്പറ്റൈറ്റിസ് വിമുക്ത ഇന്ത്യ ഉറപ്പാക്കാന് പൗരന്മാരെയും ജന സമൂഹങ്ങളെയും ആവേശഭരിതരാക്കാനും പ്രവര്ത്തനനിരതരാക്കാനും ലോഗ് ഭാഗിദാരി (ജന പങ്കാളിത്തം) പരമാവധി ഉപ്രയോജനപ്പെടുത്താന് ഡോ. മന്സുഖ് മാണ്ഡവ്യ സംസ്ഥാനങ്ങളെ ഉദ്ബോധിപ്പിച്ചു. പ്രതിരോധം, പരിശോധന, ചികിത്സ എന്നീ ത്രിതല സമീപനം സ്വീകരിച്ച് ഹെപ്പറ്റൈറ്റിസ് നിര്മാര്ജനം ചെയ്യുന്നതിനും ജനകീയ പ്രസ്ഥാനമാക്കി മാറ്റുന്നതിനും, ദൗത്യ മാതൃകയില് എല്ലാവരും പ്രവര്ത്തിക്കണമെന്നും അദ്ദേഹം നിര്ദ്ദേശിച്ചു.
