കൊച്ചി: കഴിഞ്ഞ ഐഎസ്എല് സീസണില് കേരള ബ്ലാസ്റ്റേഴ്സിനെ ഫൈനല് വരെ എത്തിക്കുന്നതില് നിര്ണായക പങ്കുവഹിച്ച മിഡ്ഫീല്ഡര് അഡ്രിയാന് ലൂണ ഈ സീസണിലും ബ്ലാസ്റ്റേഴ്സില് തുടരും. താരവുമായുള്ള കരാര് രണ്ടു വര്ഷത്തേക്കുകൂടി നീട്ടിയതായി ബ്ലാസ്റ്റേഴ്സ് അറിയിച്ചു. പുതിയ കരാര് പ്രകാരം 2024 വരെ അദ്ദേഹം ക്ലബ്ബില് തുടരും.
ക്ലബ്ബ് വൈസ് ക്യാപ്റ്റനായിട്ടായിരുന്നു ക്ലബ്ബില് അഡ്രിയാന് ലൂണ തുടങ്ങിയത്. പിന്നീട് ജെസെല് കര്ണെയ്റോ പരിക്കേറ്റ് പുറത്തായതോടെ പകരം ക്യാപ്റ്റനായി. ബ്ലാസ്റ്റേഴ്സിലെ തന്റെ കന്നിസീസണില് ആറ് ഗോളുകള് നേടിയ ലൂണ ഏഴ് ഗോളുകള്ക്ക് അവസരമൊരുക്കുകയും ചെയ്തു. ആക്രമണത്തിലും പ്രതിരോധത്തിലും ഒരുപോലെ സംഭാവന നല്കുന്ന അദ്ദേഹം ഹീറോ ഐഎസ്എല് ഓഫ് ദി ഇയര് ടീമിലും ഇടം നേടി.
