ന്യൂദല്ഹി: ഭാരതത്തിന്റെ 15ാമത് രാഷ്ട്രപതിയായി ദ്രൗപദി മുര്മു. രാജ്യത്തെ ആദ്യ ഗോത്ര വിഭാഗത്തില് നിന്നുള്ള രാഷ്ട്രപതി എന്ന സവിഷേശതയും ഈ വിജയത്തിനുണ്ട്. 5,77,777 വോട്ട് മൂല്യമാണ് ഇന്ത്യയുടെ രണ്ടാം വനിത രാഷ്ട്രപതിയായി മുര്മുവിനെ വിജയത്തിലേക്ക് നയിച്ചത്. ഇത് ആകെ വോട്ട് മൂല്യത്തിന്റെ 50% അധികമാണ്.
മൂന്നാം റൗണ്ട് എണ്ണി കഴിഞ്ഞ് രാജ്യസഭ സെക്രട്ടറി ജനറല് പിസി മോദി നടത്തിയ പത്രസമ്മേളനത്തിലാണ് ദ്രൗപദി മുര്മു കേവല ഭൂരിപക്ഷം പിന്നിട്ടത് അറിയിച്ചത്. മൂന്നാം ഘട്ട വോട്ട് എണ്ണലില് കര്ണടക, കേരളം, എംപി, മഹാരാഷ്ട്ര, മണിപ്പൂര്, മേഘാലയ, മിസോറാം, നാഗാലാന്ഡ്, ഒഡീഷ, പഞ്ചാബ് എന്നീ സംസ്ഥാനങ്ങളാണ് ഉള്പ്പെട്ടിരുന്നത്.
ഈ റൗണ്ടില് ആകെ സാധുവായത് 1,333 വോട്ടുകളാണ്. സാധുവായ വോട്ടുകളുടെ ആകെ മൂല്യം 1,65,664 ആണ്. ഇതില് ദ്രൗപതി മുര്മു 812 വോട്ടും യശ്വന്ത് സിന്ഹ 521 വോട്ടും നേടി. ഇതുവരെ മൊത്തം സാധുവായ വോട്ടുകള് 3219 ആണ്, മൊത്തം മൂല്യം 8,38,839 ആണ്, അതില് ദ്രൗപതി മുര്മുവിന് 5,77,777 മൂല്യത്തില് 2161 വോട്ടുകള് ലഭിച്ചു. അതേസമയം യശ്വന്ത് സിന്ഹയ്ക്ക് ലഭിച്ചത് 2,61,062 വോട്ടിന്റെ 1058 വോട്ടുകളാണ് ലഭിച്ചത്.
1958 ജൂണ് 20ന് ഒഡിഷയിലെ ബൈഡപ്പോസി ഗ്രാമത്തിലാണ് ദ്രൗപദി മുര്മുവിന്റെ ജനനം. സന്താള് വംശജയാണ് ദ്രൗപദി. ജാര്ഖണ്ഡിന്റെ ആദ്യ വനിതാ ഗവര്ണര് എന്ന നേട്ടവും ദ്രൗപദിക്ക് സ്വന്തം. ഇന്ത്യയിലെ ഒരു സംസ്ഥാനത്തിലെ ഗവര്ണറായ ആദ്യ ഗോത്രവിഭാഗം വനിത എന്ന നേട്ടവും ദ്രൗപദിക്കാണ്.
