ന്യൂദല്‍ഹി: എന്‍ഡിഎയുടെ രാഷ്ട്രപതി സ്ഥാനാര്‍ത്ഥി ദ്രൗപദി മുര്‍മു വന്‍ ഭൂരിപക്ഷത്തില്‍ ജയം ഉറപ്പാക്കി. കേരളം ഒഴികെയുള്ള എല്ലാ സംസ്ഥാനങ്ങളില്‍ നിന്നും മുര്‍മുവിന് വോട്ട് ലഭിക്കും. രാഷ്ട്രപതി തെരഞ്ഞെടുപ്പിന് മൂന്നു ദിവസം അവശേഷിക്കേ 68 ശതമാനം വോട്ടുകള്‍ എന്‍ഡിഎ സ്ഥാനാര്‍ത്ഥി ഉറപ്പാക്കിയിട്ടുണ്ട്. ഭാരതത്തിന്റെ പതിനാറാം രാഷ്‌ട്രപതിയായി ഗോത്രവനിതയായ ദ്രൗപദി മുര്‍മു എത്തുമെന്ന് പൂര്‍ണമായി എന്‍ഡിഎ ഉറപ്പാക്കിയിട്ടുണ്ട്. ഏറ്റവും അവസാനമായി ഝാര്‍ഖണ്ഡ് മുക്തിമോര്‍ച്ചയും മുര്‍മുവിനെ പിന്തുണയ്‌ക്കുമെന്ന് വ്യക്തമാക്കി.
ഗോത്രവര്‍ഗ വിഭാഗങ്ങള്‍ നിര്‍ണ്ണായകമായ ഝാര്‍ഖണ്ഡില്‍ വനവാസി വിഭാഗത്തിലുളള വനിതയെ പിന്തുണച്ചില്ലെങ്കില്‍ രാഷ്‌ട്രീയ പ്രത്യാഘാതം ഭീകരമായിരിക്കുമെന്ന് ജെഎംഎം വിലയിരുത്തുന്നു. അതിന്റെ അടിസഥാനത്തിലാണ് പ്രതിപക്ഷത്തിന്റെ സ്ഥാനാര്‍ഥിയും ഝാര്‍ഖണ്ഡുകാരനുമായ യശ്വന്ത് സിന്‍ഹയെ തളളി മുര്‍മുവിനെ പിന്തുണയ്‌ക്കാന്‍ ജെഎംഎം തീരുമാനിച്ചത്.
ഇത് കോണ്‍ഗ്രസിന് വലിയ തിരിച്ചടിയായിരിക്കുകയാണ്. ആദ്യമായി ഗോത്രവിഭാഗത്തില്‍ നിന്നുളള വനിത രാഷ്‌ട്രപതിയാകുന്നതിനെ എതിര്‍ക്കുന്നത് ജെഎംഎമ്മിന് വലിയ തിരിച്ചടിയാകും. മുര്‍മുവും സോറനും ഗോത്ര നേതാക്കളാണ്, ജാര്‍ഖണ്ഡിലും അയല്‍ സംസ്ഥാനമായ ഒഡീഷയിലും ഗണ്യമായ ജനസംഖ്യയുള്ള സന്താല്‍ വര്‍ഗത്തില്‍പ്പെട്ടവരാണ്. നേരിടുന്നുണ്ട്.
സംയുക്ത പ്രതിപക്ഷ സ്ഥാനാര്‍ഥി യശ്വന്ത് സിന്‍ഹയ്‌ക്ക് ആദ്യം പിന്തുണ പ്രഖ്യാപിച്ച ജെഎംഎം, ജനതാദള്‍ (എസ്), ശിവസേനയും ടിഡിപിയും നേരത്തെ തന്നെ മുര്‍മുവിന് പിന്തുണ പ്രഖ്യാപിച്ചിരുന്നു. 10,86,431 മൂല്യ വോട്ടില്‍ ഏഴര ലക്ഷത്തോളം വോട്ട് മുര്‍മു നേടുമെന്നാണ് ദേശീയ മാധ്യമങ്ങള്‍ പറയുന്നത്.
വന്‍ വിജയം ഉറപ്പാക്കിയപ്പോഴും കേരളത്തില്‍ നിന്നു ഒരു വോട്ടു പോലും ഗോത്രവനിതയായ മുര്‍മു ലഭിക്കില്ല. എല്‍ഡിഎഫ് യുഡിഎഫ് മുന്നണികള്‍ ഒറ്റക്കെട്ടായി യശ്വന്ത് സിന്‍ഹയ്‌ക്ക് വോട്ടു ചെയ്യാന്‍ തീരുമാനിച്ചിട്ടുണ്ട്. കേരളം, തമിഴ്‌നാട്, തെലങ്കാന, കോണ്‍ഗ്രസ് ഭരിക്കുന്ന രാജസ്ഥാന്‍, ഛത്തീസ്ഗഡ് എന്നിവിടങ്ങളില്‍ നിന്നുള്ള പ്രതിപക്ഷ വോട്ടുകള്‍ മാത്രമാണ് സിന്‍ഹയ്‌ക്ക് ലഭിക്കുക.
